細個時中秋應節必食菱角，但坊間有傳菱角會令男士陽痿！佢學名叫「Trapa」，英文名「Water Caltrop」，係傳統嘅農作物之一。據中醫學稱雖然菱角對人體有好多益處，但卻有損腎氣、精氣及陽道，所以對有性功能障礙嘅男士嚟講，應盡量少食。
雖然大量食用菱角會對男士嘅雄風有影響，但適量食用反而有益身體。明代李時珍所著嘅《本草綱目》稱，食用菱角具有：「解暑傷寒積熱，止消渴，解酒毒，射罔毒。」此外，又能夠補脾胃、強股膝、健力益氣，對老人家嚟講更為有益。事實上，菱角含有豐富嘅澱粉質、蛋白質、葡萄糖、不飽和脂肪酸及多種維他命，又含有胡蘿蔔素、鈣、磷、鐵等，營養豐富。
如果鍾意食菱角，又唔想有損雄風嘅話，不妨煲番個蓮子菱角湯。
材料：排骨300克、菱角200克、蓮子200克、無花果兩個、薑4片及葱一條。
做法：先將排骨出水後備用，蓮子、菱角及無花果洗淨。先將排骨、薑片及葱放入水中，再加白醋大火煮滾，撈出葱後轉細火煮一小時，再放入蓮子及菱角煮40分鐘，最後加入鹽調味便可。
功效：養心安神明目、補中養神、健脾補胃、止瀉固精。