覆盆子又稱紅樹莓或紅桑子，英文名叫Raspberry，學名Rubus Idaeus，係種常見嘅水果。不過大家又知唔知，原來呢種薔薇科懸鉤子屬嘅木本植物果實，原來具有壯陽嘅作用呢？
關於覆盆子可以壯陽嘅講法，最早嚟自北宋寇宗奭所撰寫嘅《本草衍義》，書中云：「益腎臟，縮小便，服之當覆其溺器，如此取名也。」乜嘢叫「覆其溺器」呢？即係小便時力度太勁，射到尿桶翻轉咁解！
明李中梓所撰嘅《本草通玄》中稱：「覆盆子，甘平入腎，起陽治痿，固精攝溺，強腎而無燥熱之偏，固精而無疑澀之害，金玉之品也。」清汪昂所著嘅《本草備要》中亦明言：「覆盆子益腎臟而固精，補肝虛而明目，起陽痿，縮小便。」固精嘅意思唔單止係指對遺精同腎虛有幫助，對助改善遺尿、尿頻等，就算對女士產後遺尿亦有功效。
覆盆子除咗可當水果食用，仲可用嚟泡茶。方法係將已曬乾嘅覆盆子同韭菜子各150克，碾成細粉並撈勻，每次取出15克放入茶包泡熱水。據稱可補腎壯陽，適用於改善陽痿同早洩。