人生總會有高潮同低潮，面對逆境嗰陣，點樣先可以捱得過？韓國人氣模特兒申海琳就話，最緊要有正能量。其他人咁講未必有說服力，但出自阿妹把口，相信冇乜人會質疑，事關佢係典型樂天派，笑容好有陽光味，加上身材健美，所以好得人鍾意。
喺韓國首爾出生嘅海琳，2010年開始從事兼職模特兒工作，初時嘅際遇認真麻麻，令佢覺得好無癮，甚至興起退出模特兒界嘅想法，後來有時裝雜誌搵佢影相，佢原本諗住推Job，但係經理人事務所同佢講，既然要做模特兒，點解唔開開心心咁做呢？結果呢句話點醒咗佢，自此之後，佢經常帶住笑容返工，身邊嘅工作人員都受到感染，令佢更加明白到正能量嘅可貴。假如你有乜嘢唔如意，不妨多望阿妹兩眼，或者會開心番都未定！