樣靚身材正，可以抓住男人嘅眼球，但要綁住對方嘅心，就要靠溫柔同體貼！正如韓國賽車女郎李娥璘，擁有玲瓏浮凸嘅Model身形，每次喺賽場現身都會成為鏡頭焦點，但原來柔情似水嘅性格，先係佢最令男士着迷嘅地方，難怪出道以來，人氣一直高企。
身高達174公分嘅娥璘，最初係透過朋友介紹入行，由於天生麗質，換上賽車女郎制服後更為吸睛，所以好快已經紅起嚟。不過，阿妹覺得人氣未夠勁，於是喺2011年參加咗韓國賽車女郎選美大賽，最終攞咗亞軍。成名之後，佢開始接觸其他事業，除咗做網絡直播，仲學埋綜合格鬥，家陣已當上格鬥技教練！據阿妹解釋，佢之所以要學格鬥，同性格太溫柔有關，希望唔使畀人蝦，結果做埋教練，連佢自己都估唔到。