玩性感有新招 生活添情趣

比堅尼一向係性感嘅象徵,皆因女性嘅胴體美喺有限布料下表露無遺,之但係換成男生穿着又會有乜嘢效果呢?另一方面,女生要玩性感,常見招數係露出胸前嘅「事業線」,但係次次只見到一條溝,畫面未免太單調,所以日本有本以巨乳美少女作招徠嘅寫真,用咗貓貓嚟襯托咪咪,成個觀感即刻唔同晒!

男裝版比堅尼?

乜嘢係海灘同泳池嘅最佳風景?對男士嚟講,當然係性感嘅比堅尼女郎啦!勢估唔到,男士都有專屬嘅「比堅尼」,究竟係乜嘢玩法?名為「Brokinis」嘅男裝版比堅尼係加拿大多倫多兩位男士Chad Sasko同Taylor Field所設計,佢哋解釋「Brokinis」係由「Bro」(兄弟)同「Bikini」(比堅尼)兩個字組成。有別於一般三角褲,「Brokinis」係有條肩帶連住三角褲,目前有兩個款式,一款係白底火烈鳥圖案,另一款係藍底菠蘿圖案,暫時嘅定價係45加元。如果女士們曾經被另一半嫌棄,話你嘅身材着唔起比堅尼,不妨送番件畀對方,等佢知道有啲嘢真係唔可以勉強(口架)。

貓貓、咪咪鬥搶鏡

以拍攝獨特美少女寫真而聞名嘅青山裕企,早排又推出異色寫真集《ππ喵》(パイパイニャン),係延續2017年7月推出嘅前作《π喵》(パイニャン),一睇個書名,好明顯啲相片同貓咪有關,至於個「π」字又代表乜嘢呢?原來乳房嘅日文是「おっぱい」(Oppai),當中嘅「Pai」同圓周率「π」嘅發音一樣,加上部分男士會覺得女性嘅乳房要符合「π」嘅絕對圓度,先稱得上係神乳,於是衍生出「π乳」嘅講法。話說回頭,青山裕企當年之所以用《π喵》之名出書,全因書中嘅靚相用咗咪咪(女性乳房嘅暱稱)嚟襯托貓貓(當然也可以話係用貓貓嚟襯托咪咪啦),效果可愛又誘人,相信第二集一樣會引起唔少回響。

邊啲名字最好性?

俗語有云:「唔怕生壞命,最怕改壞名!」改錯名真係會畀人笑足一世,不過,有項幾過癮嘅統計可以同大家分享吓。話說英國有購物網站早排整理網絡數據時發現,當地喺今年5月,即抗疫期間,情趣玩具嘅銷量比去年同期爆升115%,當中有79%嘅人係首次網購情趣玩具,而某啲英文名嘅男女更加係經常購買!男士方面,頭五名依次為Charlie、Mike、Ryan、Scott同Joe。女士方面,排第一位係Jessica,二至五位分別係Liz、Hannah、Sarah同Karen。由此睇嚟,改咗呢啲英文名嘅人,豈不是對性愛有比較高嘅要求?其實又唔一定係,正如網站話齋,有關排名只供參考,唔好太認真。

撰文:魂