如果工作環境缺少女性，男士們容易覺得幾枯燥吓，而呢個時候嚟咗個女同事，仲要係年輕貌美身材好嗰種，理所當然會成為一班男人嘅焦點。不過，呢位男網民卻因此被老婆懷疑：「我嗰行幾乎全部都係麻甩佬，點知老細早排請咗個女仔，仲要個樣唔錯，身材直頭冇得彈。我唔係鍾意去滾嘅人，加上工作環境極少女性，身邊除咗老婆外，真係冇乜幾個異性朋友，對呢位女同事有遐想係好正常。點知早排同老婆做床上運動時，突然諗起個女同事，跟住就幻想老婆變咗佢。女人嘅感覺真係好敏銳，佢問我頭先諗緊啲乜，表現唔同咗。我梗係唔會講真話啦！老婆勁醒，好快推敲出同女同事有關，仲懷疑我有蠱惑。老婆係個有戀愛潔癖嘅人，我哋都係初戀就結婚。唉，究竟點同佢解釋好呢？」
波比凹凸：老夫老妻嘅感應真係唔講得笑，你只係諗住其他女人啫，佢咁都Feel到，勁呀！其實你死口唔認就得，又或者叫你老婆接你放工，等佢公開宣示主權，問題唔難解決。
有條心：戀愛潔癖嘅人真係好麻煩，我條女就係咁嘅人。佢覺得初戀就一定要結婚，點知後來知道咗我嘅初戀對象另有其人，嬲到同我分咗手。但之後過咗冇耐，佢又搵番我，話自己已經冇咗初戀，可以原諒我，你話女人係咪煩吖？
長夜空虛：嗱，你拿拿臨買隻AV又得，網上搵AV亦得，然後話佢知啱啱諗起套AV嘅橋段，勁興奮，表現咪唔同咗囉，相信佢唔會呷啲AV醋啩。
大眼：你都話因為平時少見其他女人，日有所思夜有所夢，其實都好正常啫，真心唔係乜嘢大問題。只要自己覺得冇問題，講唔講都冇所謂啦。