全球疫情大爆發，希望情況能夠快啲好轉啦。其實疫境中又唔係個個咁心灰，好似之前傳出安全套缺貨，好快有人話可用取代品，而美國妓院休業，亦有囡囡話疫情一過，生意就會好番，甚至仲好過之前！由此看來，凡事向積極方面諗，呢個世界依然充滿「性」趣！
女網紅玩性感可以去到幾盡？日本網絡最近有條底褲成為話題，唔少索爆又行性感嘅女網紅都爭住試着，理由好簡單，全因呢條底褲性感得嚟又冇嘢露出喎。呢條人氣底褲名為「超超低腰超薄T-back」（超超ローライズシフォンバックリボンTバック），顧名思義，賣點在於勁勁勁低腰，之但係低成點？前面只係僅僅遮住私處，仲要用上超薄物料製成，若然毛髮稍為濃密啲，分分鐘露晒出嚟，就算唔係，鮑形都會現晒！另外，從後面睇嘅話，仲會發現走出四分之一條股罅，唔使踎低都已經超吸睛。有人就問底褲上個蝴蝶結，咪會阻住着裙或褲囉？唔好意思，着得呢條底褲上陣，就要預咗唔着裙同褲，否則點會成為網紅最愛呢？
早前馬來西亞因疫情鎖國，搞到全球最大安全套生產商Karex Bhd要停工，雖然之後恢復番五成生產力，以填補全球對產品嘅需求，但講真生產力只得一半，點可能做得切呢？咁係咪要停止啪啪啪？又唔使嘅。Redit上有網民指出，有種產品叫「Reusable Condom」，用法同一般安全套一樣，優點係用完後，只須洗乾淨兼風乾，就可以再用，而且套形設計多元化，從海腸形到海膽形都有，缺點係套身較厚，令隔膜感大增。有人話，呢款套係就係厚咗啲，但作為暫代品亦可以一用；又有人話佢嘅設計咁多，比一般安全套更有玩味。不過，有人話個套形太過惡形惡相，心理上唔係咁接受到。專家就話用呢種安全套，一定要買個啱尺寸，否則會有甩套同滲漏嘅問題。
大家都知美國嘅疫情嚴峻，而為咗抗疫，唔少娛樂設施都被迫關閉。位於內華達州兼號稱全球最大妓院嘅Sheri's Ranch亦係如此，一班妓女因而冇晒收入，但當中一位人氣妓女卻對前景相當樂觀，佢叫Roxanne Price，早前接受英國媒體訪問時稱，疫情過後，妓院會旺番，原因有兩個，一來男士們喺性方面壓抑得太耐，要搵宣洩渠道，二來啲人會更珍惜玩樂機會，所以佢預期只要妓院恢復營業，生意會比疫情前更好。問到零收入時有乜嘢做，佢話家陣幾乎全日都留喺屋企，但亦因以前晚晚都會啪啪啪，所以有啲寂寞，只能靠自己解決性需要，亦因此用多咗情趣玩具，仲話發掘咗唔少新玩法呢！
撰文：魂