男士總係有好多原因去花天酒地，應酬同工作壓力相信係最多男士用嘅理由。不過遲吓想鬆弛神經，分分鐘會少個藉口，事關最近竟然有個專為紓緩男士蛋蛋疲勞嘅產品，喺網上搞眾籌，究竟佢有乜咁厲害呢？
周身攰到爆時浸番個按摩浴，真係乜嘢能量都返晒嚟。不過如果男士只係覺得蛋蛋疲勞嘅話，又可以點幫佢減壓呢？唔使搵人幫手嘅，事關有個專為按摩男士蛋蛋而設，名為Testicuzzi嘅便攜型按摩池正於Kickstarter眾籌。呢個按摩池共有黑色、白色同14K金限量版三種顏色。男士先將蛋蛋放喺池中嘅蛋形坑位上，跟住開動電源掣後，池內便會噴出順滑嘅泡泡，不但可以為蛋蛋帶嚟按摩效果，由於按摩池係用軟膠製成關係，故此蛋蛋同兵器都能感受到軟綿綿嘅感覺。據產品設計師稱，如果用埋暖水嘅話，按摩效果會更好添。不過設計師話按摩池意念嘅產生，同鹹濕一啲關係都冇，而係因一次閒聊時，發覺唔少男士試過被繃緊嘅褲襠壓到蛋蛋不適，於是便萌生呢個諗法。產品眾籌期至11月26日，有興趣可以去睇睇。
識個樣靚身材正嘅女性難唔難？喺呢個交友App愈嚟愈普及嘅時代，其實有唔少人會用呢個方法嚟識異性。不過各位又知唔知喺交友App上，邊款個人大頭相最能吸引異性嘅目光呢？美國交友網站eHarmony最近就對此進行調查，結果發現男性攬住寵物嘅相，最能吸引女士嘅目光。據分析稱，女性喺交友App上，最希望搵到嘅唔係想玩一夜情嘅男士，而係希望識到有安全感嘅男性，而呢啲相正好畀到佢哋呢種感覺。不過相對男士嚟講，最能吸引佢哋目光嘅女性大頭相，卻原來係身穿比堅尼嘅照片。大家咪以為同鹹濕有關，分析指呢種相片除咗令男士有性嘅聯想外，亦可以展現出女性活潑同陽光嘅一面，從而帶嚟健談嘅感覺，減少交流時嘅尷尬感。
每當講起性愛問題，男士總係諗住粗啲、長啲同耐啲。不過澳洲有性學家指出，男女喺性愛上最常出現嘅問題，其實同性表現嘅關係並唔大，反而有兩個問題先至係最常見。究竟係乜呢？據呢位性學家稱，男士喺性愛上最常遇到嘅問題，排名第二嘅係勃起功能性障礙。遇到呢個問題嘅男士，總係會感到極度困擾，尤其係當佢哋唔能夠同女伴或老婆解釋清楚時，會引嚟更加多相處上嘅猜疑同困難。排名第一嘅就係性慾減退。佢話呢個問題唔單止喺男士身上發生，有相當多嘅女性都被同樣問題所困擾，佢哋往往以為呢個係正常嘅情況，而冇諗過點樣去解決，結果形成相處上嘅困局。佢話其實只要更加多嘅身體接觸，自然喚起心理反應，而實際操作則要視乎個別情況。
撰文：魂