有謂「一段感情嘅終結，係另一段感情嘅開始」，之但係當另一段感情發生後，上一段感情嘅印記仲應唔應該留低呢？不過呢位男網民嘅印記又真係有啲爭議性，佢話：「我有個嗜好，就係鍾意影女友嘅床照，但大家唔好亂諗，所謂床照只係對方嘅瞓覺相，感覺浪漫又甜密，所以我好鍾意影。不過現任女友就係都要我刪咗Ex嘅床照，佢質問我留低啲相係咪用嚟自娛。大佬呀！我對天發誓絕對冇咁嘅諗法，Ex係鍾意裸睡，但一點都冇露過，仲要影得相當靚，重點係我嘅私人記憶嚟，刪咗佢咪即係刪咗我嘅記憶？講真，現任嘅床照我都好用心影，仲靚啲添，佢做乜咁小器喎。我將啲相儲存喺電腦度，唔知點解畀佢搵到出嚟，結果咪吵大鑊囉！佢可唔可以尊重吓我嘅回憶呀？」
網友回應：
J神仔：呢個問題重點應該係，做乜要留住你個鍾意裸睡嘅Ex嘅床照呀？所以現任女友先至會問你係咪想用嚟乜乜啫。其實我覺得應該刪咗佢囉，因為你嘅Ex都未必想你Keep住啲相。
絲夢：你同Ex嘅相真係只得床照？冇其他相（口架）嗱？你女友之所以發脾氣，好明顯係覺得呢啲唔係你嘅回憶，而係你對Ex嘅性幻想嚟啦！我撐佢發嬲呀！你呢啲男人真係超渣。
路華：你根本係用回憶嚟包裝你對Ex嘅念念不忘！我都係男人，亦知道乜嘢叫藕斷絲連，而作為一個尊重女友嘅男人，你絕對應該尊重現任嘅意見，除非你只係玩玩吓。
同你開年：女人就係咁煩，我留低前女友嘅嘢就唔得，佢Keep住前男友嘅相就冇問題，我真係睬佢都傻！不過講埋個下場畀你聽，跟住我哋分咗手。