情到濃時乜肉麻嘢都會做齊，有啲情侶甚至會互拍裸照添！不過拍完之後又覺得後悔點算好呢？呢位女網民早前喺網上求教，問點樣可以叫男友徹底刪晒啲火辣相，佢話：「早排去爆房，我貪得意趁男友沖涼時拎手機影佢，之後佢又影番我。完事後，我諗諗吓覺得唔係咁好，於是叫佢刪除晒啲相。點知過咗幾日之後，佢突然Send番當晚嘅相畀我睇，我咪扯火話佢點解冇刪除，佢話要留念慢慢回味，我好認真同佢講，但係佢就當我講笑。我對呢段感情係認真嘅，但係邊個會知以後嘅事係點，你話點樣可以叫佢刪除晒啲相呢？」
網友回應：
好盤推介：所以話就算係拍拖，都要識得點樣保護自己，點可能搵呢啲嘢嚟搞先得！嗱，家陣乜計都冇喇，你點知佢有冇Back Up呢？
Gold Visible：我從你嘅字面睇得出，其實你對佢唔係咁有信心囉，如果冇信心，當初你又點解會同佢玩啲咁嘅嘢呢？貪玩係要付出代價。
IG繼續玩：講到刪相嘅話真係冇乜實際嘅辦法，唯一嘅方法就係睇吓佢尊唔尊重你嘅意見囉，睇吓佢見你咁認真，仲要玩埋冷戰嘅話，相信佢都會就範嘅。
愛情保鮮度：如果佢唔係玩家或者係賤男嘅話，佢應該都會刪嘅，除非佢根本唔重視呢段感情啦！不過佢死都唔肯刪相，睇怕呢段感情好難冇裂痕囉。
撰文：魂