南韓嘅模特兒界出名索女多，樣貌出眾嘅固然唔少，同時擁有魔鬼身材嘅更係有排數，但係講到擁有秀氣過人嘅氣質，就非秀氣女神朴有英莫屬，阿妹身材高挑兼且玲瓏浮凸，加埋迷人秀氣，令男士神魂顛倒。
以前喺唔少人眼中模特兒只不過係花瓶，但喺今時今日，模特兒界競爭愈嚟愈大，單憑外表難以脫穎而出，想長期Keep住人氣，就要好似朴有英咁擁有兩個法寶，第一個係外表清秀而不落塵俗，事實上呢種氣質係由佢細個開始培養出嚟，原來佢父母希望佢成為知書識禮嘅淑女，所以朴有英嘅言談舉止都溫文有禮。而另一個法寶，就係佢並非胸無點墨嘅人，畢業於首爾祥明大學環境工程學系嘅佢，係一位知識型女性，而當年佢希望能夠為社會建設出一分力。不過命運有時就係咁有趣，話說喺讀大學期間，朴有英諗住陪朋友參加模特兒面試，卻估唔到自己竟然入選，意外嘅結果令一直冇諗過從事模特兒工作嘅佢，決定以兼職模特兒身份出道，並開始攝影模特兒工作，憑住出眾嘅外形同氣質，好快就獲得相當高嘅人氣，於是事務所就安排佢喺車展上登場，化身成優雅又性感嘅車模，結果成為展場上嘅焦點，自此以後佢便經常喺各個大型車展上演出。
雖然模特兒事業發展得相當順利，但係有英仍未想全身投入做Model，因此大學畢業之後，佢成為朝九晚五嘅白領一族，不過忙碌嘅上班生活，令佢唔係咁適應，尤其係自由度方面，始終都係模特兒工作夠自由，結果佢做咗白領儷人冇耐，便決定辭工，並以職業模特兒身份出道。由於佢離開模特兒界時間並唔長，人氣並無受到太大嘅影響，加上佢鬥心極高，不論係拍攝雜誌定係車展活動都密密咁做。及後佢以賽車女郎身份喺釜山嘅賽事上登場，須知道有英身材相當火辣，換上性感嘅賽車女郎制服示人，唔單止胸前深溝成為吸睛位，超短迷你裙下嘅長腿，更係引到唔少在場男士流晒口水。憑住呢次成功嘅演出，令佢嘅人氣提升到新高峰，更成為賽車隊伍嘅專屬賽車女郎，不過佢仍然不斷挑戰自己，喺各類型嘅電子產品、電玩展、動漫節等大型活動中以Show Girl身份登場，令人氣愈嚟愈高。然而勤勞嘅代價就係令健康出現問題，有英為免自己捱到病入膏肓，於是喺2011年暫別模特兒界，休息咗一年之後復出，不但人氣更勝從前，變得更有女人味嘅佢，更成為南韓模特兒界中嘅秀氣女神。
簡介：朴有英秀氣嘅形象固然迷人，而佢標致嘅五官加上玲瓏浮凸嘅身材，同樣吸引到男士嘅目光，不過佢認為自己最吸引嘅地方，係一對修長美腿，配襯迷你裙嘅話，迷人度倍增！如果大家想了解佢多啲，就要Click入呢個網喇！
網址：http://cafe.daum.net/u0love
出生地：首爾
身 高：172cm
三 圍：34-24-34
撰文：魂