一地眼鏡碎聖子輸畀長腿小花

大熱倒灶

時光匆匆，話咁快2018年已經嚟到第二季，而最近日本AV界亦有第二個盛事圓滿結束，就係緊接Sky PerfecTV成人放送大賞之後隆重舉辦嘅「DMM成人大獎2018」喇！一如以往，今年入圍嘅女優全部都係極具人氣，正如AV達人宮地謙典話齋，今屆入圍女優個個都質素超班，所以每個獎項都有一番龍爭虎鬥，未去到最後都唔知結果如何。喺5月19日晚，「DMM成人大獎2018」頒獎典禮正式上演，結果都幾令人意外，甚至係一地眼鏡碎，因為被視為大熱門嘅「日本一彈性巨乳」，並且有7冠王稱號嘅前寫真偶像高橋聖子居然只獲得「優秀女優獎」，聽到司儀宣讀嘅時候，聖子都不禁一臉愕然，因為呢個「優秀女優獎」只係屬於亞軍獎，而奪得真正嘅大獎「最優秀女優獎」嘅女優，正係氣質綺麗嘅長腿小花橋本有菜！由於有菜一直都認為自己得獎機會唔高，所以當司儀宣布佢得獎一刻立即爆喊！

雙喜臨門

宣告「最優秀女優獎」由橋本有菜奪得之後，有菜就上台從上屆獎項得主三上悠亞手中接過獎座，致詞時依然難掩又驚又喜嘅神情，有菜多謝大家支持之餘，亦話估唔到自己會攞呢個獎，令佢意想不到。老實講，有菜喺賽前被睇低一線，所以阿妹早前去咗箱根神社求神保佑。而有菜得到大獎可以話係雙喜臨門，第一喜當然係連高橋聖子都要做佢手下敗將，一吐喺上屆競逐「最優秀女優獎」時輸畀羽咲美晴嘅烏氣，第二喜就係有菜獲得傳媒獎「周刊WeeklyPlayboy獎」。

至於高橋聖子好快從失落嘅心情回復過來，喺社交網表示能夠得獎，心情亦感到高興，以後會繼續努力。不過講到最傷心失望，應該係小淫娃椎名空喇，事關椎名空已連續3次提名角逐「最優秀女優獎」，佢本身都好有信心今次能夠成功得獎，好可惜又係空手而回，唔怪得佢喺後台同大槻響合照嘅時候眼濕濕喇！

櫻空桃挫寧寧

講到爆冷，除咗「最優秀女優獎」之外，「最優秀新人女優獎」一樣出現大熱跑輸嘅情況。作為「最優秀新人女優獎」大熱門，被稱為AV界超新星，喺上年「AV OPEN 2017」中勇奪3個大獎嘅吉高寧寧，今次一個獎都冇，而「優秀新人女優獎」就畀「十年一遇之神乳」水卜櫻攞咗，至於「最優秀新人女優獎」則由前寫真偶像櫻空桃擸走，寧寧真係慘慘豬喇！

當晚眾多入圍女優都有出席，此外仲有上屆獎項得主擔任頒獎嘉賓，如三上悠亞、明日花綺羅等，頒獎前仲請來多個表演團體上台載歌載舞，好似惠比壽麝香葡萄、BAND JA NAIMON!、MARRION APPAREL以及AK-69，令現場氣氛更為熱烈。之但係，有一位得獎女優居然甩底唔嚟，佢就係憑作品《Fade In》贏得「最優秀作品獎」當中「動畫部門獎」以及「銷售部門獎」嘅仲村美羽喇！原因係仲村美羽暫時無意回歸AV界，但係佢知道得獎之後亦喺社交網表示多謝大家支持。

撰文：賢