擤鼻 有助達到高潮?

性感誘人嘅定義雖然因人而異,但講到底最重要始終都係男士嘅感覺,好似美國有條西褲設計超性感,睇到男士流晒鼻血!另外,又有品牌推出性感無比嘅12星座女性內衣,同樣超級養眼。不過講到最實際嘅係有心理治療師表示女士喺啪啪啪前,只需要擤吓鼻就能提升獲得性高潮嘅機會!

刺激大腦分泌

點樣可以令女性獲得性高潮,唔單止係性學家一直以嚟研究嘅項目,亦係唔少男士關注嘅問題,事關作為一個負責任嘅男士,最希望可以喺床上既滿足到自己,又可以令女伴高潮迭起。不過大家都估唔到,原來有個相當簡單嘅方法,就能夠令女性增加6倍嘅機會獲得性高潮。英國心理治療師Philip Hodson表示,方法就係當女士喺啪啪啪前先擤一下個鼻,等呼吸變得暢通便能更易獲得性高潮。據呢位心理治療師解釋,男女性接觸時其中一個運用到嘅器官就係鼻子,而透過鼻子可以聞到對方嘅體味,刺激到自己嘅大腦分泌,提升性反應。不過由於喺啪啪啪時,絕大部分女士總會忽略咗呢個身體部位,故此Philip建議女士喺啪啪啪前,先清潔一下鼻孔,等呼吸暢順啲,同時又可以提升嗅覺靈敏度,有助聞到對方嘅體味而達致性高潮。咁究竟呢種方法得唔得呢?真係要試過至知喇!

超誘人繩綁西褲

之前介紹過一條超爆窿牛仔褲,而潮流呢樣嘢真係日日新鮮,最近又有一條褲喺日本網絡引起話題,究竟呢條褲有乜特別,令佢注目度極高呢?呢條由美國時裝品牌Fashion Nova推出,名為「Wild Thang Lace Up Pants」嘅女裝西褲,從後面睇唔覺得有乜嘢特色,當大家從正面睇嘅話,就會畀佢超性感嘅設計嚇親,皆因西褲嘅正面只有一塊三角形嘅布啱啱好遮住重要部位,而從大腿到小腿嘅褲管部分全部都係一條條嘅白繩,將一雙腿徹底展露出來。據該品牌稱呢條西褲以棉、聚酯纖維及彈性纖維混合製成,因此極具彈性,更加貼身,而呢個設計最重要嘅目的,就係凸顯女性嘅美腿,同時令雙腿變得更修長。不過,如果雙腿較粗嘅女士們就唔係咁適合穿着,皆因啲肉會一截截咁唧晒出嚟,真係好肉酸囉!此外,呢條褲之所以成為日本網民嘅話題,因為佢哋唔知道應該點樣穿着,先至唔會被啲繩卡住腳趾?仲有應該着乜嘢款式嘅底褲嚟配襯最適合呢?不過對於貪靚嘅女士嚟講,花多啲時間去着褲又有乜所謂吖!

12星座香艷內衣

女人約會遲到嘅原因有好多,其中一個就係要花時間襯衫,皆因對佢哋嚟講,要令一次約會變得更有意思,唔單止外表着得好睇,就連胸圍同底褲都要襯到絕。如果男士唔想因為女友搵唔到啱着內衣而煩惱嘅話,不妨送呢套星座內衣畀對方,包佢稱心又滿意。呢套由美國內衣品牌Yandy推出嘅12星座女性內衣系列「Yandy Zodiac Collection」,將唔同星座嘅內衣糅合咗透視及喱士設計而成,令佢變成一套性感誘人嘅內衣,而佢更係根據唔同星座嘅性格嚟設計,例如性格浪漫嘅雙魚座,為咗配合佢哋浪漫得嚟又含蓄嘅性格,設計師特意運用湖水藍嘅色調,並設計成一件頭卻有帶有透視感嘅性感內衣,讓充滿浪漫感嘅雙魚座女性唔單止可以日常穿着,同時亦可當成睡衣;至於好奇心旺盛嘅雙子座,設計師就用上鮮黃色,配合喱士嘅胸圍底褲,火辣性感之餘,更係邪氣十足。據設計師解釋,由於雙子座具有自我矛盾嘅特徵,而呢款內衣不但予人甜美時髦嘅感覺,同時帶有令人蠢蠢欲動嘅誘人魅力。如果想知道女友所屬星座嘅內衣係點嘅樣,可以去佢嘅官網睇吓,話唔定可以幫你換嚟一夜激情都未定o架!網址:https://www.yandy.com/zodiac-lingerie

撰文:魂