有個撈女，嫁畀一位大老闆做黑市夫人，當年係由傍友穿針引線，傍友試過，確係各樣條件及床上功夫都冇得彈，然後一腳波交畀老細。
撈女手段高強，一年內，已經斬得十幾粒，可惜賭運不佳，在澳門的百家樂亦輸去唔止十粒，所以依然得個吉，只不過食兩餐安樂茶飯，唔使咁奔波勞碌而已。
近幾個月，大老闆唔係幾掂，面口唔係幾好，過水亦唔過得順，撈女十分激氣。
一日，傍友打電話畀撈女度水，要一千，女曰：「你都唔知我近來幾慘，老闆成個星期唔見面，好似避債一樣，不過你唔掂我點都要幫你，一千未有，先畀住五舊先，你派人來，我交畀佢。」
傍友曰：「老實話你知，波士想撇你，千萬小心，唔好畀佢鬆綁。」
撈女曰：「我知，多謝你提示。」
大老闆真係想將撈女撇開，一來玩到厭，二來確係手緊，以前開支票一萬幾千好平常，現時一二千都覺得唔係嘢小，撈女呢頭黑市住家，六七千一個月唔少得，所以就唔想要呢間金屋。
一晚，大老闆返到金屋，見撈女在燈下挑手襪，問曰：「你做乜？」
女曰：「挑一打有七毫子，一日都挑得七八打。」
老闆曰：「阿彩呢？」
女曰：「辭咗佢了，我一個人，你又甚少返來，自己煮自己食，好簡單，慳番成千銀一個月。」
老闆歉然，本來想返來借故大發脾氣，就與撈女分手，但見此情形，脾氣又點發得出，嘆曰：「要你咁捱法，好對唔住，我想……我……」
女曰：「千祈唔好話叫我走，現在世情唔好，我一定會同你捱，捱到你順境至講，我唔係短情無義之人也。」
老闆無話可說，只有繼續維持呢間金屋。
撈女打過算盤，此時外面風大雨大，真係冇乜地方好避雨，所以係都要將老闆綁住。
撈女士急馬行田，知道老闆有意撇甩佢，因而出奇謀，度條橋出來，使到老闆不捨得與她分手，而且仲多咗嚟享受魚水之歡添！
一九七五年一月三十一日