瞬間變性感

球迷坐喺球場等足幾十分鐘,只係為咗睇愛隊取得入球嘅一瞬間,就係因為見證到呢一瞬間而感到無比快慰同亢奮!如果大家能夠見證住一個美少女蛻變嘅呢一瞬間,係咪會更加興奮呢?咁就不如睇吓偶像派美少女久住小春嘅新寫真集從中感受一番啦!25歲嘅久住小春係紅極一時嘅早安少女組前成員,由2005年效力團隊到2009年,從團體畢業之後,小春同好多青春偶像一樣向寫真界發展,推出個人寫真集,現時小春活躍於影視圈,發展理想。

最近,小春有感自己變得愈來愈成熟,決定相隔8年之後推出寫真集,並將之命名為《Moment》,希望大家見證佢從美少女蛻變為性感美人嘅一瞬間!小春為炮製呢本寫真集,特別去到關島取景,盡情以性感泳裝以及內衣演出,從中除咗可以欣賞到鮮嫩胴體,亦可以睇到小春嘅面孔變得風韻迷人,顰笑間都流露淺淡嘅妖艷之色,跟以前嘅小春果然唔同,別具韻味。

書名:《Moment》

售價:約HK$206

撰文:賢