三圍超誇張嘅女角色，加上激烈床戰同汁液橫飛嘅場面，若然再配合埋重口味嘅題材，呢類成人漫畫雖然可以喺短時間內畀到讀者極大嘅官能刺激，但講到襟睇嘅話，就點都唔及輕鬆又浪漫嘅愛情漫畫，好似日本著名成漫家ASIO嘅代表作《高山神社的春香小姐》，相信會滿足到你。
出生於日本富山縣嘅ASIO，起初熱衷於喺同人漫畫圈發表作品，另一方面佢亦係一名插畫家，畫功相當有水準，尤其係筆下嘅美少女美感十足。及至2008年佢全心投入成人漫畫創作之中，膽粗粗將自己嘅作品送到成人漫畫出版社Core Magazine，結果獲得出版社賞識，將其作品刊登喺《漫畫Bangaichi》，同時邀請佢定期喺旗下雜誌繪畫漫畫，就係咁樣，開始咗職業成人漫畫家嘅生涯。
隨住喺成漫界獲得成功，之後佢被少年漫畫月刊《Dragon Age》及《Age Premium》邀請繪畫封面。及至2010年1月，終於迎嚟首本成漫單行本《高山神社的春香小姐》，作品大受好評，更被喻為代表作。由於反應極好關係，同年推出第2本成漫單行本《秘密的組織Break》，同樣獲得相當好嘅成績。除咗創作成人漫畫外，佢嘅搞笑四格漫畫一樣有極多捧場客，更被唔少漫畫家邀請幫忙，畫番幾格漫畫刊登喺自己嘅作品之中。
《高山神社的春香小姐》收錄咗ASIO喺成漫月刊《漫畫Bangaichi》、《Comic Megmilk》等發表過嘅作品，當中梗係唔少得點題作品《高山神社的春香小姐》共6話，另外仲有《給她再多一點……》、《MEN'S BLACK》、《麻煩☆甜心》及《由佳媽媽》等。由於ASIO人緣極好關係，故此不但獲得一眾人氣成漫家好似卷田佳春、小宮裕太等為佢寫推薦文，更被成漫評論家大讚其畫功成熟又活潑，係一本色氣相當濃厚嘅佳作。講到書中最獲得好評嘅作品，必然係點題作《高山神社的春香小姐》及輕鬆小品《MEN'S BLACK》。
《高山神社的春香小姐》嘅故事發生喺一間位於深山嘅古老神社，女主角春香係神社繼承人兼擔任巫女一職，情竇初開嘅佢一直暗戀鄉土史研究員石田。有一日石田嚟到神社，春香便自告奮勇幫忙，卻意外打開咗孤獨鎖妖嘅封印兼被對方附體，為咗平復鎖妖嘅孤獨感好讓對方升天，於是春香要求同石田交歡，最後成功讓鎖妖離開。不過兩人嘅關係卻因為呢次肉體接觸而變得曖昧。喜劇感十足加上豐富嘅角色，令呢套小品之作更具追看性。
而《MEN'S BLACK》講述男主角富山為咗讓女友松原沙百合覺得自己係個出色嘅男人而感到煩惱，富山其中一個損友提議佢將自己打造成壞男人形象，絕對可以迷倒沙百合。於是富山變身成壞男人同沙百合約會，更拉對方到情侶酒店交歡。完事後沙百合嬲嬲豬，富山便道出內情並且衷心道歉，結果沙百合原諒富山。而一班損友以為奸計得逞，點知當佢哋見到富山同沙百合嘅關係更加融洽時，當堂大跌眼鏡。
書名：《高山神社的春香小姐》
作者：ASIO
出版：Core Magazine
頁數：198頁
撰文：魂