一支洗潔精竟然可以成為網絡熱話，原來係同佢個樽嘅顏色及設計有關，令人產生邪念。另外，日本有「成人託兒所」設有一間十八禁部屋，牆身貼滿性感女優嘅海報，究竟有乜用途呢？
如果問大家一支粉紅色長棒形，手感滑溜嘅物件，當用手擠壓佢時，頂端會流出透明狀嘅液體，大家估吓佢係乜？唔畀諗，即刻答！相信唔少巴打都會諗到邪嘢。話說日本有位女網民Asuna早前喺Twitter上分享咗一張如此香艷嘅相片，只見佢手上拎住一支粉紅色長棒狀物件，並特寫頂端流出嚟嘅透明液體，原來係某日本日用品品牌推出嘅洗潔精。Asuna表示非常唔明白，點解呢支洗潔精會有如此令人邪念十足嘅設計，不論樽身同樽頂嘅設計，都恍如男士嘅如意棒。而呢條貼文一放上網，即時引嚟日本網民熱議，並且非常認同呢支洗潔精嘅外形好似如意棒，亦有網民建議洗潔精用完後可作其他用途。其實呢個名為「泡的力量」（泡のチカラ）嘅清潔產品系列，全部產品嘅樽身設計都係一樣，之但係點解淨係呢支洗潔精才會惹人遐想呢？有人分析應該係同佢粉紅色樽身有關，配合埋獨特嘅樽身，容易令人產生邪念。但話時話，係咪啲人諗多咗呢？
位於日本群馬縣甘樂郡甘樂町一處山谷之間，有間「成人保育園」（アダルト保育園），日文中嘅「保育園」解做託兒所，但係有「成人」兩個字，究竟係畀成年人定幼兒入去玩呢？門口嘅牌上就寫住「男人60歲以上隨意進入，女人限49以下」，咁好明顯係畀上咗年紀嘅男女進入，最搞笑係仲寫明保育園嘅保母分別有演歌歌手藤彩子、坂本冬美及伍代夏子，仲有水着女優壇蜜同橋本愛實添！而園內設有一間部屋，裏面除咗擺放桌椅及梳化，仲有成人雜誌，牆身更貼滿寫真海報及AV女優嘅裸照！據現年77歲嘅保育園園長中條狹槌表示，佢之所以打造一個如此另類又充滿色氣嘅地方，目的係為咗令老人家開心啲，因為附近有好多老人居住，保育園可以為佢哋提供一個聚腳地方，尤其係色氣部屋，伯伯們可以喺當中搵到自己鍾意嘅女優，並且大談女人經，真係一樂也！此外，保育園內亦有唔少休閒設施，畀老人家喺度飲茶傾偈，其實建立保育園嘅出發點係一啲都唔鹹濕o架！
男人都想喺床上雄風四射，但係都市男兒由於受到多方面嘅壓力，容易出現勃起功能障礙，咁究竟都市男嘅生理問題有幾嚴重呢？英國健康醫藥零售商Pharmacy Outlet早前訪問咗當地超過2,000名男士，結果發現倫敦男士出現勃起障礙嘅比率最高，有百分之四十嘅男士表示有呢個問題。研究團隊指出倫敦男士之所以喺勃起問題上出現如此嚴重嘅情況，不但跟工作壓力有關，亦同男女關係唔愉快有密切關係。專家認為男女相處唔融洽，令男士更傾向於以自娛方式解決性需要，久而久之便會造成影響，最終導致出現勃起功能障礙。除此之外，倫敦男出現患上性病嘅情況亦嚴重，有百分之二十九嘅男士表示曾經患上性病之餘，又經常出現口臭、腸易激綜合症、香港腳等問題。不禁令人嘆一句，都市男兒真係唔易做呀！
撰文：魂