每次聽到鄰家女孩時，總係第一時間諗起純情少女，卻又往往唔會同火辣身材產生聯想。不過蔡飛妮卻話畀大家知，其實鄰家女孩般嘅純情氣息，同時亦可以擁有前凸後趷嘅惹火身材，而佢就係憑住呢種魅力，喺南韓模特兒界獲得極高人氣。
出生於南韓首爾嘅蔡飛妮，一直以嚟都係一位萌系美少女，尤其係佢純情如鄰家女孩般嘅氣質，更係唔少人眼中嘅溫柔女孩化身，卻估唔到有朝一日佢竟然會成為一位模特兒，原來就連佢自己亦冇諗過會以模特兒作為事業。早喺2010年，當時仍然就學嘅佢喺一次偶然嘅機會下，陪同朋友去參加模特兒應徵活動，朋友為咗壯膽，於是提議佢一齊試鏡，當時飛妮覺得自己沒有模特兒嘅外形，加上略帶嬰兒肥嘅俏臉，所以認為可以入圍嘅機會極微，卻估唔到憑住鄰家女孩嘅氣質，配合玲瓏浮凸嘅火辣身材，竟然令佢成功打入第二輪面試，其後更被模特兒公司睇中，邀請佢當全職模特兒，呢個意外嘅邀請令佢措手不及，事關佢對模特兒工作一啲認識都冇，經過向前輩請教，對模特兒職業有咗一定認識後，就決定加入成為模特兒界一員，先以平面攝影模特兒作為起跑點。
飛妮表示，當時佢表現得相當緊張，而本身對化妝一啲概念都冇，更係花咗唔少時間鑽研一番，漸漸佢知道點樣去展現自己嘅獨特氣質。累積唔少工作經驗後，2011年終於迎嚟首次喺大型活動上演出嘅機會，但係有別一般南韓模特兒先喺車展上亮相嘅模式，反而喺首爾舉辦嘅一級方程式上以賽車女郎嘅身份登場，性感嘅賽車女郎制服加上火辣嘅身材，令飛妮成為賽場上嘅焦點，更喺同場舉辦嘅賽車女郎比賽中，榮獲最佳表現賽車女郎獎。
初出道就成功獲得獎項，固然令飛妮感到高興，同時亦為佢打咗一支強心針，事關一直以嚟佢為自己略為豐滿嘅外形而感到煩惱，而透過呢次比賽，佢明白自己嘅身材，加上鄰家女孩嘅氣質，獲得唔少人嘅讚賞。呢次比賽之後，佢不但先後喺多個賽事上以賽車女郎身份亮相，同年又喺多個車展上演出，化身汽車品牌站台車模展現魅力。當佢積極喺賽車女郎及車模界發展嘅同時，並未放棄平面攝影模特兒嘅工作，喺2012年舉辦嘅美妝模特兒選美比賽中，更獲得最上鏡模特兒獎，足證佢嘅外形有幾咁迷人。
純情氣質加上火辣身材，固然係佢嘅賣點，但係良好嘅人際關係亦係令佢成功脫穎而出嘅原因之一。唔少同佢合作過嘅攝影師都表示，有別其他模特兒，飛妮嘅工作態度相當專業，為咗滿足攝影師嘅要求唔會諸多推搪，好似有攝影師為咗配合主題，要求佢瞓喺泥地上，身上沾上泥土以突出野外嘅感覺。聽到攝影師咁講，飛妮二話不說就瞓喺泥地上，呢種積極嘅態度難怪深得大家歡心。不過亦有人指，飛妮最吸引嘅地方在於天然呆，每當佢專注喺一件工作上時，卻往往會忽略一啲細節，好似喺一次車展中，佢為咗貼近展出車輛畀人影相時，一直都冇留意自己嘅大髀上竟然沾有輪胎上嘅污漬，直到有人提佢先至恍然大悟，正正係佢呢種天然呆嘅萌味表現，令佢成為南韓模特兒界中，一位與別不同嘅女模。
出生地：首爾
身高：167cm
三圍：35、25、35
簡介：雖然蔡飛妮面形略帶少許嬰兒肥，但卻因為咁嘅緣故，令佢散發出鄰家女孩嘅味道，配合激凸身材，帶畀人一種火辣辣嘅視覺享受。如果大家想了解阿妹多啲，就要Click入呢個網站喇！
網址：http://cafe.daum.net/limeunbin
撰文：魂