唔少女性化妝前同化妝後個樣真係有好大分別，不過對於天生麗質嘅女生嚟講，化唔化妝其實分別唔大，反而透過變換髮型，可以帶畀人極大嘅視覺衝擊，好似南韓人氣模特兒河詩英正係好例子。
出生於南韓首爾嘅河詩英，身材高挑，擁有一對修長美腿，加上迷人五官，叫人一見傾心，除咗呢啲外在優勢之外，佢身上散發出一股嫵媚嘅女人味，令男人無法抗拒。喺2010年10月佢投身模特兒界，跟唔少同行姊妹一樣，最初先主力拍攝平面硬照累積經驗，當時佢年紀輕輕，略帶青澀嘅味道，但係舉手投足間所散發出嚟嘅女人味，加上玲瓏浮凸嘅身材，令人眼前一亮，亦因為咁嘅緣故，佢好快喺業界打響名堂，先後喺多本時尚及化妝雜誌上亮相。獲得一定工作經驗之後，翌年詩英將工作戰場擴展到Show Girl界，於多個商品展覽活動中登場，而呢次亦係佢首次同大眾接觸。
詩英表示，當時佢相當緊張，仲有唔少蝦碌事情發生，幸好仍然不減佢個人魅力，成為展場上嘅焦點。隨住人氣愈嚟愈高，之後佢踩入車模界，喺車展上以性感車模造型示人，經過呢次曝光機會，令佢人氣大爆發，及後佢踩入賽車場，喺一級方程式賽車南韓站中擔任賽車女郎，憑住陽光氣息及濃郁嘅女人味，成為賽場上其中一個亮眼焦點，自此佢不但成為賽場常客，更自2013年起連續3年成為一支西班牙車隊嘅專屬賽車女郎。
至今詩英已經成為一位具人氣兼全面嘅模特兒，得到呢個成績相當唔錯，亦係開始密謀朝往更多方向發展嘅時候。不過佢唔係咁諗，事關佢覺得自己之所以能夠獲得如此高嘅人氣，全因佢係模特兒，如果脫離模界走去演藝界發展嘅話，成績未必會比現時好，佢亦擔心自己力有不逮，因此經過深思熟慮後，佢決定專心喺模特兒界發展。
原來唔經唔覺佢做咗模特兒已經超過7年，可能有人認為新鮮感不再，而佢亦覺得係時候要改變一下自己，至於最好嘅方法係乜？就係將留咗好耐嘅長髮剪去，變成一頭清爽短髮。然而，作為一位以女人味見稱嘅模特兒，突然改變形象嘅話，大眾一時間可能未必接受到喎？事實上，詩英曾經都有過擔憂，但係佢認為改變形象不但帶畀大家新鮮感，而且令更多人認識到佢唔同嘅一面，故此決定揮鉸剪剪去長髮，結果唔少人都覺得佢嘅新形象反而更有個性，散發出清新味道，就連佢自己亦冇諗過外界嘅反應會咁好。而自變髮之後，工作量增加唔少，甚至得到代表汽車品牌到海外車展參展嘅機會。不過最令佢滿意嘅事，相信大家都估唔到，佢笑稱剪咗一頭短髮後，唔再需要花時間打理頭髮，感覺好舒服。另外，佢話就話唔會喺演藝界發展，但其實佢一啲都唔抗拒參與演出電視節目，好似早前佢喺多個綜藝節目亮相，唔知佢日後會唔會改變決定呢？
簡介：雖然詩英以模特兒工作為主，但面對愈嚟愈大嘅工作壓力，近年有減產嘅迹象，希望佢只係想畀多啲時間自己休息一下啦！如果大家想了解佢多啲，就要Click入呢個網站。
網址：http://cafe.daum.net/HA-SIYOUNG
出生地：首爾
身高：175cm
三圍：34、23、34
撰文：魂