要達到成功，究竟係天賦重要啲，定係後天努力至係重點呢？對於日本成人漫畫家Michiking嚟講，兩樣都係咁重要。事關擁有畫漫畫天賦嘅佢，不但擅長繪畫精細又像真嘅線條，而憑住後天嘅努力，講故事技巧愈嚟愈強，難怪佢嘅單行本作品《主僕Ecstasy》咁受歡迎。
自細對漫畫有濃厚興趣嘅Michiking，10年前開始執起畫筆繪畫，佢表示從未諗過會以畫漫畫作為事業。擁有畫漫畫天賦嘅佢，好快就已經上手，畫出質素上佳嘅插畫作品，而鍾愛巨乳美少女嘅佢，筆下嘅女角色相當誘人，心口一對巨乳展現出令人心跳嘅質感。不過，當時佢喺講故事嘅技巧上頗為稚嫩，為咗提升呢方面嘅能力，佢向唔少漫畫家學習，經過不斷努力，終於獲得極大進步。
2012年佢跟漫畫家Signi小姐合組成人漫畫同人圈「Anmitsu Yomogi亭」，同年5月以同人圈名義推出首本成人漫畫同人誌《Anmitsu Yomogi亭》，即時引嚟成人漫畫界嘅注意，皆因成熟又具美感嘅畫工，根本唔似出自初出道嘅成人漫畫家手筆，難怪當時有人猜測佢嘅真身係一位畫開全年齡向嘅專業漫畫家。
憑住同人誌嘅出色成績，佢喺成漫界嘅人氣不斷提升，2013年獲得成人漫畫月刊《COMIC 快樂天》嘅編輯賞識，得到喺月刊上發表作品嘅機會，從此宣布正式加盟成人漫畫界。雖然佢喺月刊上發表嘅成人漫畫相當受歡迎，但佢卻一直遲遲都唔願意推出單行本，理由係仍未有足夠嘅佳作。及至2015年11月，佢終於推出首本單行本作品《性活周間》，呢本被喻為情慾與愛欲前所未有如此平衡嘅單行本，令佢嘅知名度直線攀升，但係講到令佢人氣真正爆發嘅作品，就係呢本《主僕Ecstasy》。
《主僕Ecstasy》收錄咗Michiking曾於成人漫畫月刊《COMIC 快樂天》發表過嘅14個單元故事，包括《烏冬麵師傅的清晨》、《妄想作家佐藤先生》、《羅剎編集 佐藤小姐》、《夢想作家詩百合先生》、《主僕與三角褲》、《主僕Returns》、《主僕幽會》、《人心掌握超能力》、《正妻系義妹》、《大人的階梯》、《誘惑睡眠》、《忽然cafe time》、《深感抱歉》及《告訴我，優君》。其中《妄想作家佐藤先生》同《羅剎編集 佐藤小姐》呢兩個故事，備受成漫評論家及成漫迷所激讚，究竟呢兩個故事有幾吸引呢？
《妄想作家佐藤先生》講述花名「雞屁股」嘅女漫畫家詩百合，以繪畫成人漫畫為職業，腦海中經常浮現各種色慾場面，不過佢一直係零性愛經驗，而且對男性極為抗拒。有一日，詩百合要趕稿關係，故此拜託漫畫社編輯佐藤小姐搵助手幫忙，點知對方竟然搵咗個叫做鏑木敬太嘅男助手畀佢，當詩百合第一眼見到敬太，腦中即時湧現各種被敬太侵犯同凌辱嘅畫面，點解會咁嘅呢？
《羅剎編集 佐藤小姐》中嘅佐藤小姐，正正係喺《妄想作家佐藤先生》出現過嘅女編輯。故事講述性格幹練嘅佢，有日對一位新進成人漫畫家阿創進行訓話，對方雖然畫工出色，但情慾內容卻相當膚淺，因而推論阿創仍係處男一名。為咗令呢位具有潛質嘅成漫家能夠蛻變，於是佐藤小姐決定利用自己嘅肉體令阿創開竅。阿創喺佐藤小姐嘅「鼓勵」下，靈感不斷爆發，從此朝住人氣成漫家之路進發。
漫畫名稱：《主僕Ecstasy》
作者：Michiking
出版：Wani Magazine
頁數：232頁
撰文：魂