早前曾報道過以前台灣色情場所有拜祭天蓬元帥同狐仙嘅習俗，只係隨住時間推移，家陣愈嚟愈少場所會咁做。不過近期卻發現，拜祭嘅習慣又出現番，好似早前高雄市前金區一間色情美容店，就被警方發現佢哋不但拜狐仙，更結合手機社交應用程式嚟吸引玩家捧場。大家睇到呢度會發現，拜狐仙嘅效果如果係好嘅話，個場就唔會咁快畀人掃，而有趣嘅係呢間美容店冇耐前亦曾經被掃蕩，亦即係重新開業冇耐再中招！話說呢間美容店被掃後，有關當局又收到線報，指美容店死灰復燃，不但再次開張營業，仲喺網上搵客，於是警方再次組織行動，對美容店秘密搜證。警方發現美容店喺網上以暗語吸引玩家外，更推出早晨優惠套餐。當搜齊證據後警方即時採取行動，將美容店32歲陳姓負責人逮捕，而行動中更當場查獲36歲林姓小姐，正跟一名23歲陳姓玩家提供半套服務。另一單有趣嘅事發生喺林女身上，如果大家有睇過早前報道嘅話，唔知記唔記得有位林女，佢諗住拜狐仙吸客，點知冇耐就被警方掃場，兼查出佢係一宗詐騙案嘅通緝犯呢？而今次斷正嘅林女，正正係同一個人。原來佢釋放出嚟後又返去美容店做，而佢亦繼續拜狐仙，結果再次被警察拉咗，唔同嘅係今次佢係衰提供性服務。對於短時間內美容店再次復業，警方呼籲業者勿心存僥倖而以身試法。