好多女仔都鍾情於熱愛運動嘅男仔，不過有調查顯示呢類男士出軌機會最高。喺冰天雪地最好梗係圍住火爐取暖，但係早前有一班俏佳人竟然嚟個性感泳裝滑雪，一啲都唔怕凍，仲熱力過人！男士想成功溝女需要咩條件？有錢原來只係其次，識得照顧人先至最值得女人欣賞。
家陣好多人都追求健康，注意飲食之餘，仲會養成運動習慣，大家不難發現近年上街跑步及踩單車嘅人多咗好多，而運動除咗可以促進身體健康，以及幫助紓緩壓力，仲可以令身材更弗更有力量，故不少女仔都鍾意熱愛運動嘅男仔。之不過，一個叫「Golfsupport.com」嘅網站進行過一項有趣嘅調查，當中訪問咗1,750個有運動習慣嘅成年男士，結果發現受訪男士之中大部分都曾經有出軌行為！而呢班出軌男以玩欖球嘅為數最多，點解呢？負責呢次調查嘅Kelly Cambell博士表示運動可以提升男士嘅睾丸硐水平，令男士喺女士面前更有吸引力之外，性慾亦同時提升，咁就自然容易勾三搭四，背住女伴偷食啦。至於進行欖球比賽，球員必定有身體接觸或撞碰，更容易激發起佢哋嘅獸性及與隊員之間嘅競爭性，而雄性除咗喜以武力令其他雄性屈服，以將女伴數目視為競爭項目，所以更趨向四圍溝女。
俄羅斯人近年被稱為「戰鬥民族」，除咗因為佢哋生得高大，外形雄壯非常，就算唔打得都睇得，所以小弟一直都認為AV界不妨邀請俄男擔任男優角色，一定可以令作品更有睇頭！其實俄妹亦一樣實力非凡，從早前喺索契舉行嘅滑雪活動中可見一斑喇！當日天氣寒冷，而滑雪場更係鋪滿厚厚嘅積雪，但係在場嘅男士們一定唔會覺得凍，甚至會覺得熱辣辣，因為現在有1,498人以泳裝代替滑雪裝，喺雪地齊齊興奮滑雪，當中唔少都係身材姣好嘅美人兒！而呢個泳裝滑雪活動上年都搞過一次，當時有387人參與，至於今年就多咗成千人咁多！點解會多咗咁多人呢？除咗因為大家都想借機會狂歡一下，仲想將活動打入健力士紀錄，希望大家願望成真，唔使白白捱凍啦！
好多男人都話家陣啲女仔講金唔講心，早前一個嫩模所講嘅「有樓有高潮」恍如道盡香港女仔嘅心聲，不過小弟確信女仔其實唔係我哋諗得咁膚淺，一層樓就可以令佢哋貼貼服服，最好就梗係要有樓同時好似韓國男星咁靚仔啦！然而，作為唔靚仔亦賺錢唔多嘅一群如你同我，又係咪真係一世都溝唔到女呢？咁又未必喎！網站「sunshine.co.uk」早前訪問咗2,176位年齡介乎18至34歲嘅單身女士，以了解一下屬於新生代嘅女性到底有咩擇偶條件，結果顯示77%受訪女性認為男方嘅經濟能力屬於重要嘅一環。咁係咪靚仔有着數呢？75%女仔表示會考慮男方嘅外觀，之但係上述兩個條件都只係排第二位同第三位啫！咁邊樣係女仔最注重嘅環節呢？就係識得照顧他人喇！有88%女士指出男仔如果懂得照顧他人係最有吸引力！至於第四位係鍾意去旅行，第五位則係有幽默感。各位男士收到未，冇錢又唔靚仔的話，盡量喺女仔面前表現出對人關愛嘅一面喇！
撰文：賢