不論男人定女人都會着襪，但係有一種襪男人係唔會着嘅，就係絲襪！當然有人話強國男性都會着絲襪，咁係因為文化唔同啫，Anyway，絲襪始終都係女人着先至好睇。不過話說回來，大家知唔知5月15日被定為絲襪日（ストッキングの日）呢？
點解5月15日會係絲襪日（ストッキングの日）呢？據稱1940年5月15日，係尼龍絲襪喺美國正式開賣日，而喺呢日之前，美國絲襪市場一直被日本嘅貴價絹製絲襪所壟斷，而平價嘅尼龍絲襪出現，令絲襪從此成為大眾都能承擔嘅消費品，故此呢一日就被一班絲襪迷視為紀念日。而每年嘅絲襪日，一眾日本插畫家、漫畫家同Cosplayer都會喺網上分享絲襪畫作及絲襪寫真。
至於邊種絲襪最為吸引嘅爭論卻一直不斷，而爭論可以分為兩個戰場，一個係「吊帶襪與襪褲之爭」，另一個則係「白絲襪與黑絲襪之爭」。不過近年卻係以襪褲及黑絲襪派佔據絕對優勢，好似日本媒體《Buzz Plus News》曾經對300位男士進行關於「女生裙下穿着乜嘢絲襪最正」嘅投票，結果黑絲襪以百分之三十四嘅支持度，完勝白絲襪嘅百分之十三點三，因為呢個緣故，每年絲襪日日本嘅網絡總會被各種黑絲襪佔領，令唔少人誤以為5月15日係「黑絲襪日」。其實「黑絲襪日」嘅正日係每年9月5日，大家唔好搞錯喇！
既然日本有唔少絲襪粉絲，梗係冇可能冇絲襪同好會，講到當中最具江湖地位嘅，卻非呢個絲襪戀物俱樂部（パンストフェチ俱樂部）莫屬。呢個俱樂部由一位叫做Milk嘅絲襪迷喺1996年成立，屈指一算至今已有21年歷史。據Milk稱，俱樂部成立嘅目的係為咗聚集一眾對絲襪有無比熱愛，熱愛到戀物程度嘅同好而設，因此俱樂部不但會定期舉辦絲襪攝影會，仲會廣邀同好上載自己拍攝嘅絲襪相。可能有人見到戀物兩個字，就以為佢係一個鹹濕同好會，只係睇番佢哋嘅照片，其實都幾正經！此外，俱樂部仲會喺網上跟同好分享所有涉及到絲襪嘅廣告、新聞同電影等。雖然俱樂部以絲襪為主題，但其實除咗絲襪之外，仲會跟同好分享棉質短襪、運動褲同波鞋等嘅寫真作品，內容多元化。
講到絲襪迷漫畫家，卻要數成人漫畫家大噓，代表作有2011年8月推出嘅插畫集《請把襪子還給我》，及2012年3月推出嘅成人漫畫單行本《美腳摩擦主義》。自稱係一位深度足控嘅大噓，認為只有着上絲襪嘅美腿，先至可以突出到美腿嘅魔力，尤其係女性啱啱除出嚟略帶餘溫嘅絲襪，更可滿足男人對女性嘅幻想。因此由佢喺同人漫畫界開始，到佢正式以成人漫畫家推出單行本，所有插畫同漫畫嘅女角色個個都例必着住絲襪，當中喺腳趾上嘅絲襪橫向縫線，佢覺得係最靚嘅一個部分。由於佢坦白流露對絲襪嘅熱愛關係，故此其人氣不但喺日本相當高，就連內地亦有唔少粉絲。
日本有唔少插畫家同漫畫家喺網上分享以絲襪美少女為主題嘅畫作，不過對於唔擅長畫絲襪，卻又想參與其中嘅人嚟講又點算好呢？日本十八禁插畫兼漫畫家Yomu（よむ）喺個人Twitter上分享畫絲襪6個步驟。鍾愛黑色絲襪嘅佢以黑色絲襪為例，第1步係先畫好腿部草圖；第2步喺上面塗上黑度百分之八十，亦即偏少少灰嘅顏色；第3步再喺上面塗上肉色，尤其係膝頭同腳趾位要塗得光亮啲；第4步加上陰影並擦去草稿線；第5步加上反射光，留意光源從邊度射入；第6步，喺絲襪上加上白線同白點，以增添質感及光澤。佢表示不論係乜嘢顏色嘅絲襪，只要跟住呢6個步驟去畫，就能展現出絲襪嘅美感。
想身體力行感受絲襪嘅樂趣，有日本玩家表示最好嘅方法莫過於去風俗店玩餐飽。講到當中最受日本絲襪迷歡迎嘅風俗店，就要數呢間位於鶯谷嘅出張風俗店「Panst」。呢間風俗店喺2010年開業，講明係為咗一班絲襪迷而設，因此店內嘅風俗孃唔單止以絲襪美腿嘅造型登場，仲可以按玩家嘅要求，換上唔同顏色同款式嘅絲襪。不過呢間風俗店最特別嘅地方，係玩家只需要額外畀多2,000日圓（約140港元），就可以着埋絲襪同風俗孃一齊玩。據風俗店稱，佢哋發現部分絲襪迷有着絲襪曳曳嘅癖好，為咗優化佢哋嘅體驗，於是推出呢種咁貼心嘅安排。自從呢種服務推出以嚟，加上120分鐘18,000日圓（約1,260港元）嘅價錢，確實深得一眾絲襪迷嘅熱愛。
撰文：魂