每次有日本知名女藝人下海拍AV，都會引起各界廣泛討論，而喺3月尾引起日本網民熱烈討論嘅唔係女藝人，而係一名知名男藝人！話說早前日本AV廠KMP嘅官網上，故作神秘表示將會有「超大物」男藝人隆重下海，唔少網民都揣測邊個男藝人最有可能淪落拍AV，而大家所估嘅都係青靚白淨嘅小鮮肉男星，例如高大又後生嘅高畑裕太，之不過萬萬估不到，原來全部都係惡作劇！
大家估完又估都未等到KMP發布進一步消息，直至3月31日KMP終於揭盅，原來係現年51歲嘅中坑林下清志，仲話會喺4月1日公布同邊個AV女優合作。林下清志喺日本算薄有名氣，原本係整骨師嘅佢7度結婚又7度離婚，同咁多位前妻一共生咗20個仔女，而其撫育眾多仔女嘅艱苦生活更被拍成電視節目《痛快!ビッグダディ》。林下清志喺下海決定公開之後亦喺博客表示自己家陣獨力養緊8個仔女實在太辛苦，所以要拍AV幫補家計！之不過，消息一出大家都對呢位唔靚仔又唔大隻，而且已經皺晒皮嘅鬍鬚阿叔冇好感。但係鬧還鬧，喺4月1日下午3點，大家都趕住Click入KMP官網睇吓清志同邊個女優合作，網站更一度因為太多人瀏覽出現短暫故障添！呢啲正正就係潮語所講嘅「口裏說不，身體卻很誠實」喇！又要鬧又要睇！
到網站回復正常，大家只係見到林下清志嘅一張照片，上面寫住一段文字，意思大概就係「愚人節快樂！」以及「下海傳聞係假嘅，而今年係KMP 15周年就係真嘅！」雖然大家都知道今次係KMP夾埋林下清志同大家開個玩笑，但係日本人一向都好認真，而好多AV迷亦不虞有詐，加上KMP雖然唔似賭神咁預早喺過去500鋪賭局當中扮摸戒指呢下小動作，但係早於一星期前就已經搭好呢個雞棚嚟「裝」廣大AV迷，故令大家更加信到呢個下海消息十足十！當AV迷得知真相後都喺網上留言大罵，更加有AV迷預祝KMP同其姊妹AV廠早啲破產添！如果閣下認識日本朋友的話，就千祈唔好同佢哋開玩笑、鬧着玩喇！
愚人節惡作劇喺日本頗盛行，近幾年喺呢一日都會出現好多網絡謠言。至於AV業界，愚人節惡作劇一樣有唔少，好似喺2015年AV廠Prestige公布知名Cosplayer牛島良肉會下海拍AV，連封面都有埋添！有「露出女王」之稱嘅牛島良肉一向以性感演出而聞名，歷來亦有好多好似佢咁嘅Cosplayer下海，故此大家都相信此消息，後來P廠就自爆消息只係同大家喺愚人節開嘅玩笑。上年KMP旗下嘅宇宙企劃又再重施故技，同樣搵來牛島良肉喺愚人節「再下一城」，睇嚟KMP對於玩弄AV迷真係樂此不疲！至於點解KMP特登搵牛島良肉嚟作賣點呢？其實係呢位美人兒素來同KMP有交情，兩者更加合作炮製出《牛島良肉》系列AV作品添！只不過到家陣佢仲未肯下海拍AV，就真係令大家失望咗少少囉！
撰文：賢