裸女月曆大集合

新一年嘅月曆你準備咗未!細佬當然明白掛牆月曆經已失去實際功能,只要有手機、平板喺手,未來廿年假期都一目了然!之但係月曆嘅存在價值唔係用嚟睇,係用嚟儲先啱!識買梗係買裸女月曆,但記住鹹濕都要講層次,千祈咪再買嗰幾本老餅鹹書裸女月曆,不妨參考細佬今次嘅推介,掛喺屋企不但凸顯個人品味,儲番幾廿年留畀下一代,分分鐘好值錢添呀!

地球最貴

一本月曆可以賣幾貴?20,000美元一本你信唔信,你冇睇錯我亦冇寫錯,被喻為係藝術品嘅NU MUSES最豪華版本售價約155,000港元,話係地球最貴月曆睇怕都冇人反對啦!點解咁誇?第一玩限量,由著名法國攝影師David Bellemere親自操刀,搵嚟全球最紅超模全裸上陣,好似墨西哥索模Alejandra Guilmant、巴西Ariela Oliveira、美國Anna Wolf、俄羅斯Vika Levina及印度Nidhi Sunil等等,大師過去作品只限出現於法國版《Playboy》、《Vogue Paris》及《Vogue UK》。呢本月曆早前喺美國Art Basel in America展出,分為限量100本豪華版,每本有獨立編號及David Bellemere親筆簽名,設計成寫真集咁款,採用真皮由人手製作而成,更附送一個透明架用嚟擺放月曆,好有藝術Feel呀!買唔起,可以買平一半價錢嘅Premium版,盛惠10,000美元,仲嫌貴嘅可以普通硬盒套裝,都係齊頭1,000美元之嘛!

現實與夢幻

睇得月曆即係要面對現實啦,但做人就係唔想面對現實,又要睇又唔想接受,可以點?咁睇Micaela Schaefer嘅月曆相信可以幫你逃避一下現實!現年32歲嘅德國女演員Micaela Schaefer向來新聞多多,當中大部分同色情扯上關係,好似舊年佢喺柏林響應當地嘅Venus Festival露兩球益街坊,其實佢一向都鍾意晒波示眾,雖然大家見怪不怪,但阿姐佢呢個月曆好有誠意,分別搵嚟俄羅斯、荷蘭、奧地利及納米比亞等標誌性人物全裸演出,背景配上不同代表性地標,製作出呢本夢幻得嚟又現實嘅月曆,賞心悅目!

Micaela Schaefer Nude For Calendar 2017

售價:約HK$196

抵食夾大件

英國太陽報《The Sun》由60年代一份小報,變成今日報稱日銷200萬份大報,不能不認「第三頁女郎」(Page 3 Girl)居功不小!原先係著名模特兒寫真,後來轉為每日登場嘅晒波裸女。無奈堅持40多年,喺2015年初被當地不少衞道之士、女權分子,以反對品味低俗、販賣色情、物化女性等抗議「第三頁女郎」繼續刊登,好在只係停咗一個禮拜又重見天日,為天下男人爭取福利。所以不論你係「第三頁女郎」死硬粉絲與否,為表支持,一年一本嘅Sun Page 3月曆真係唔慳得o架!呢本A3尺寸月曆收錄咗過去一年最正嘅第3頁妹,包括Rosie Jones、Rhian Sugden、India Reynolds及Holly Peers等等,件件都正到爆,睇多10年都唔覺Out呀!

Sun Page 3 A3 Calendar 2017

售價:約HK$57

零舍醒神

英國玩大波,美國興玩色情,咁法國又點呢?咪高貴優雅兼浪漫囉!唔信?你睇吓法國時尚雜誌《Lui》2017月曆先啦!請嚟4位「Victoria's Secret Angels」演出,分別係超模Hilary Rhoda、Elsa Hosk、Anais Mali及Barbara Palvin全裸登場,唔好以為佢哋就咁企定定影相就算喎!呢班索模又黑絲又綑綁,你話每朝起床睇到件咁正嘅女,真係零舍醒神呀!

公益大晒

掛住公益行頭就乜都大晒o架啦!自從2009年開始,為慈善出力,英國Warwick大學男子划船隊隊員都會瞓身出版裸體月曆為乜乜乜癌症基金籌款,籌到幾多冇乜人理,大家最關注嘅係隊員「波哋」有幾優美!坦白講,男子組嗰本HeHe味甚濃,而女子組則於2014年出現,雖然曾被貼「色情」標籤惹起爭議,但因為公益都冇人敢阻止,踏入2017年,10多位隊員為當地一個名為「Macmillan Cancer Support」的組織拍攝全裸黑白照,每本月曆定價£9.9,抵到冇朋友,所有收益撥捐組織,咁有意義,唔係唔撐嘛?

Women's 2017 Calendar

售價:約HK$94

撰文:祖