有喜有悲「聖」起「音」殞

話咁快2016年已經嚟到尾聲,回顧過去一年小弟可謂悲喜交集,喜嘅係識到一個前所未有咁鍾意嘅女仔,悲嘅係個女仔表示前所未有咁討厭小弟嘅行為。無獨有偶,2016年日本AV業界同樣有喜亦有悲,今日就為大家嚟個大事回顧,綜合一下今年嘅AV之最啦!

最快彈起 高橋聖子

一如以往今年日本AV界出現好多頒獎典禮,而最受AV迷注目嘅一定係AV OPEN 2016喇!上一屆話題女王小向美奈子就威晒,今年就輪到一位新人威到盡,成績甚至超越小向美奈子!巧合嘅係呢位咁威水嘅新人同美奈子一樣都係來自寫真界,佢就係有「寫真界救世主」之稱,原名高崎聖子嘅高橋聖子喇!青春無敵,擁有陽光氣息嘅正統派美少女聖子身材一流,胸前對G奶脹卜卜夠大又夠彈性,挾住寫真界救世主之名喺今年年中進軍AV界氣勢如虹,更加可以話遇神殺神!憑住作品《Gカップ完璧ボディ芸能人 高橋しょう子 MOODYZ AVデビュー!!》一口氣喺AV OPEN 2016狂擸7個獎,分別係「綜合大獎」、「女優賞」、「作品賞」、「セル売上賞」、「配信売上賞」、「レンタル売上賞」及「女優部門賞」,一出道就成為7冠王,家陣佢進軍歌唱界發展,彈起速度之快認真前所未有,真係威過威士忌呀!

最傷感 紅音螢

對於資深AV迷嚟講,一提到「潮吹」,第一時間諗起嘅唔係現役AV女優大槻響、友田彩也香,又或者係原名堀口奈津美嘅廣瀨奈奈美,而係叱咤風雲,以一身前無古人嘅潮吹功夫而令人眼界大開嘅一代癡女掌門人紅音螢,由2004年出道以來,除咗以出水量驚人嘅潮吹場面聞名,亦以搏殺演出俘虜廣大AV迷之心,一直活躍到2008年引退,人氣依然高居不下。唔拍AV,紅音螢擔任預防愛滋病宣傳大使,為公益出力,另外亦從事艷舞工作,引退後生活可謂多姿多采。之不過,紅音螢喺今年8月15日被發現倒斃家中!據消息指死因同呼吸系統疾病有關。可憐嘅紅音螢就此香銷玉殞,終年32歲,AV迷心碎!

最不捨 霞果穗

今年有好多優質新人出道,同時亦有好多堪稱極品嘅經典女優引退,除咗喺上年年尾事先張揚嘅人氣小淫娃上原亞衣之外,令一眾AV迷,特別係老一輩AV迷最為不捨嘅引退女優一定係出道11年,以絕色美貌、苗條身材以及感染力十足迷盡萬千AV迷嘅霞果穗喇!而霞果穗為咗報答AV迷支持,喺引退作中破天荒玩二穴中出,對AV迷絕對係一份最佳紀念品!

除咗霞果穗之外,今年引退嘅經典女優仲有妹系偶像櫻木凜、重口味女王水菜麗、G奶極品松岡千菜、麻倉憂、篠田步美、天海翼、丘咲愛蜜莉以及星美梨美等等,佢哋對AV界嘅貢獻及付出,相信大家都會銘記於心,在此祝佢哋引退生活愉快。

最呻笨 坂口杏里

坂口杏里嘅阿媽係紅極一時嘅寫真女神坂口良子,良子仙遊之後留低一筆遺產,可惜阿女杏里不事生產,加上沉迷落鴨店做大花筒,搞到遺產冇晒仲要欠債,咁點算?咪下海拍AV囉衰女!杏里同M廠合作嘅本番AV作品《芸能人ANRI What a day》於10月1日上市,好可惜!睇過嘅AV迷,包括忍耐度極高嘅小弟都大嗌頂唔順兼呻笨,因為杏里身材又瘦又平胸,個妝又濃又哨牙,三角地帶嘅皮膚深色兼粗糙,認真不堪入目!最近杏里仲話要食住個勢推出第二隻AV作品,咪玩啦!同一招用嚟對付聖鬥士係冇用嘅,我哋AV迷中咗一次伏更加唔會中第二次,你慳啲啦!

最成功反底 初美沙希

初美沙希出道至今已經6年,雖然甜美又可愛,身材亦有前有後,但係做咗咁多年都係搵唔到機會發圍,連續兩屆入圍Sky PerfecTV成人放送大賞最優秀女優獎都係空手而回。前年,沙希作出大突破,開放前後門畀兩位男優玩人肉三文治,沙希作出咁大嘅犧牲果然有回報!喺今年舉行嘅Sky PerfecTV成人放送大賞中,沙希成功反底,以出色又賣力嘅演出獲得眾多AV迷投票支持,終於獲得最優秀女優獎,同時憑作品《新人 初美沙希初亮相》贏得「最佳作品獎」、「成人放送大賞」以及傳媒獎之一嘅「夕刊Spa! 獎」,成為「成人放送大賞」舉辦12年以來嘅第一位4冠王!認真威番次喇!

最掘尾龍 藤原瞳

喺2016年年中鬧出一單疑似逼良為女優嘅事件,而涉事人物就係小淫娃藤原瞳!AV女優事務所Marks嘅社長以及幾位AV業界人士被日本警方逮捕,指控佢哋強迫藤原瞳拍AV!據悉,藤原瞳引退之後被男友發現佢拍過好多AV作品,而瞳妹就向男友哭訴話當時只係被迫,喺百般不願意嘅情況之下剝衫演出,男友聽到之後怒不可遏,要替瞳妹討個公道,於是就同瞳妹報案,而警方亦火速採取行動逮捕有關人等,雖然事件最後得以平息,但為AV界帶來一股恐慌,真係要多得藤原瞳呢條掘尾龍搞風搞雨喇!

最鹹濕 田淵正浩

提到AV OPEN 2016,今年除咗跑出7冠王高橋聖子之外,今年大會新增男優獎,以表揚出色嘅AV男優,而呢個獎嘅得主就係今年49歲嘅田淵正浩!正浩哥嘅地位一直都受女優以及男優們推崇,而佢扮演嘅多數都係專搞人妻嘅鹹濕上司角色,形象十分突出,榮獲男優獎可謂實至名歸!

撰文:賢