車模唔單止要樣靚同好身材，仲要有相當嘅氣質，先至可以喺名車旁邊仍不失光輝，而要數兼具以上三個條件嘅話，近年喺南韓炙手可熱嘅崔星河絕對係其中之一。佢能夠喺芸芸車模之中脫穎而出，除咗因為佢外形艷麗動人，更有股與別不同嘅肉感魅力，征服男人嘅心。
出生於南韓首爾嘅崔星河，名字不但相當有美感，外形更係令人一見傾心。先唔講佢迷人嘅樣貌同標致嘅五官，玲瓏浮凸嘅身材不論以華麗嘅車模套裝，定係以賽車女郎制服示人，都唔能夠掩蓋得到誘人嘅身體曲線，加上高挑嘅身材，如此出眾嘅外在條件，試問又點可能唔令人留下深刻嘅印象呢？除此之外，有別於一般嘅車模，佢並非以纖瘦身材而獲得大家注意，反而因為稍有肉感嘅體形，令人有種親切嘅感覺，同時又散發出一種獨特嘅高貴味道。憑住如此出眾嘅條件，佢喺2011年加入模特兒界後被公司器重，並喺同年嘅大邱車展中處女登場。極具新鮮感嘅面孔，加上無人可以挑剔嘅外形，令佢成為車展上嘅焦點，而佢嘅迷人美態照片更瞬間紅遍網絡。正當大家期待佢跟住落嚟將喺邊個車展上登場之際，佢竟化身成賽車女郎喺電單車冠軍賽中亮相，將其火辣身材盡情展露，人氣直線飆升，從此奠定一線車模嘅地位。
隨住人氣不斷攀升，佢唔再局限喺車模界中發展，開始進軍時裝、商品及寫真模特兒界，頻頻喺各種平面媒體及商品展銷活動中登場，透過大量嘅曝光機會，令佢嘅名字深入民心，同時展現出佢豐富嘅可塑性。有曾經同佢合作過嘅攝影師表示，佢好有鏡頭觸覺，並且融合現場嘅燈光，加上美妙嘅肢體動作，從而構成誘人嘅照片。點解佢特別有鏡頭觸覺呢？原來係同佢熱愛攝影有關。喺佢成為模特兒前，一直以想成為攝影師，不但進修過攝影課程，更經常鑽研名師嘅攝影作品及技術。縱然佢當上模特兒，卻一直冇放棄攝影，每當有時間，佢就會帶住部相機周圍拍攝。雖然唔知幾時可以欣賞到佢嘅作品，但可以肯定嘅係經過長年累月嘅經驗累積，讓佢喺模特兒事業上成為一大助力。
簡介：外表斯文高貴嘅崔星河，其實性格活發好動，因為工作關係，令佢唔可以喺大家面前表露出真性情。唔知大家喜歡活潑定高貴嘅星河多啲呢？想了解星河多啲嘅話，就要Click入佢嘅IG喇！
網址：https://www.instagram.com/byulha_/
出生地：首爾
身高：177cm
三圍：35、24、35
撰文：魂