年過30嘅人都係睇住互聯網興起嘅一群，從當年上網目的只係為咗收Email，到今時今日成為日常生活嘅一部分，網絡嘅發展真係已經超出想像。隨住互聯網嘅普及，就連色情服務亦喺呢個網絡洪流中出現改變。唔知再過多10年，色情業同網絡又會有乜嘢發展呢？
以往喺內地搵應召囡囡，唔係靠招嫖色情卡片，就係靠熟人介紹，然後玩家打電話畀對方安排睇女同交易。不過隨住手機社交App普及，家陣搵女唔使打電話，只需要上網就可以睇晒囡囡嘅樣、身材同埋價錢，亦因為咁嘅情況湧現一批網絡淫媒。佢哋嘅營運方式相當簡單，主要係用兩個唔同嘅社交App帳號運作，一個用嚟進行商業推廣及跟玩家聯絡，另一個則用嚟管理及安排囡囡嘅工作。舉個例，帳號A上面擺晒每位囡囡嘅照片等資料，玩家睇到啱心水嘅囡囡就會喺帳號A同對方聯絡，指定喺邊間酒店見面。帳號A收到資料後，就會同管理囡囡嘅帳號B聯絡，然後派出囡囡服務。當囡囡交易完畢後，帳號B就會將收入分拆畀帳號A。呢種做法嘅好處係分工夠細之餘，亦對帳號管理人，亦即淫業人士嘅身份起到保密作用，更重要係有利於業務推廣。不過佢哋卻忽略咗一個問題，其實內地有關當局若然要查嘅話，網絡亦非一個安全嘅空間。
台灣嘅色情服務其實亦係要靠網絡，無他嘅，因為家陣嘅人不但習慣上網，而對玩家嚟講上網睇女同搵服務都不知幾咁方便，好過以前又要打電話，又要睇樣先至可以入到閘。台灣嘅色情業者為咗吸引玩家，大部分都會上載囡囡嘅相到網絡，等玩家可以睇到滿意先至預約。經過多年嚟網上運作嘅心得，佢哋發現要吸引玩家嘅目光，最重要係靠對咪咪！據佢哋講，玩家睇唔到樣都冇問題，睇唔晒手手腳腳亦冇問題，只係如果睇唔到胸部嘅話，佢哋點都唔會搵呢個囡囡，而呢個問題喺外送茶服務中更為明顯，所以業界人士都樂於將囡囡嘅心口相擺上網。不過問題嚟嘞！唔係個個囡囡都好身材喎！有業界人士透露，其實嗰啲相片只有不足一成係囡囡嘅真實照片，至於其他則係從網絡上搵番嚟。如果係咁玩家咪好容易會彈女？業界人士稱，其實玩家早就有晒「人不對相」嘅心理準備，更何況搵女已經要好大勇氣，好多時佢哋都唔想再花時間喺揀女上，結果都係會選擇入閘。
大部分日本風俗店都有官網，等玩家可以喺入店前，先睇吓收費同服務資料，最重要係睇吓邊位風俗孃最啱心水，咁就可以直接預約。不過呢啲風俗孃嘅照片，卻係被日本玩家所詬病嘅地方。事關風俗孃為保密身份關係，故此唔係用手遮住個樣，就係索性喺塊面度打上格仔，搞到玩家都唔知點樣揀。就算有啲風俗孃報稱以真樣上鏡，只係經過電腦加工嘅佢哋，真人絕對會同相片有出入。為咗避免呢個情況出現，位於大阪難波嘅出張風俗店「出精道樂」，就對風俗孃推出非強制性嘅真樣示人計劃。風俗孃可以自願選擇係咪以真樣出鏡，而佢哋嘅相亦保證唔會經電腦加工，只係拍攝角度就有保留。雖然係咁，但相對以往嘅用手遮面同打格，已經好得多。據講由於真樣示人嘅風俗孃，佢哋嘅指名人次比遮面嘅多好多關係，故此令唔少風俗孃心郁郁。至於風俗店眼見反應咁好，更計劃未來會推出VR睇樣介面，讓玩家用VR眼鏡睇得更真更清楚。
撰文：魂