好多男士都對自己嘅命根大小相當執着，但係專家就話要滿足女伴同命根嘅大與小冇乜關係。不同國家嘅人民都有不同「性」格，最近就有調查了解歐洲多個國家嘅男女最想要幾多個性伴。單身男想搵番個女伴，究竟點樣增加成功約會嘅機會呢？
男人對女友有好多要求，要生得靚女、身材要前凸後趷，又要床上夠主動，仲要有技巧，但畀佢哋搵到一個合心水嘅女友都仲未夠，仲要一腳踏兩船，所以心無厭足呢句說話用嚟形容男人就啱喇！不過，正所謂將心比心，女仔又會唔會好似男人咁多要求呢？特別係男人嘅命根方面，女仔又會唔會介意對方嘅命根短呢？早前英國兩性關係專家Wendy Walsh博士就引述咗一個來自倫敦嘅調查結果，指出女士們欣賞男方嘅最後一件事情就正正係命根兒。專家表示自原始時代以來，女性對男人嘅要求都係想得到保護同支持，關心男方可唔可以養活自己多於性事嘅滿足度。專家補充話到咗現代社會，上述要求都唔會有多大改變。另一方面，大部分女性都唔介意男方嘅命根大細，而且滿足於現時男伴嘅命根尺寸。各位男士聽到啦！與其介意自己嘅命根，不如關心一下有冇好好呵護同照顧女伴仲好啦！
古時男人都會三妻四妾，但係家陣社會唔同晒，各地社會多奉行一夫一妻制，就算唔諗住結婚只係拍拖，其實要處理一個女朋友都幾辛苦，因為佢哋對男仔要求都幾高，特別係要求男友付出更多時間去陪佢哋同招呼佢哋，仲邊度有咁多時間出去溝女吖！當然，男士們享唔到齊人之福，點都會幻想一下，咁唔知佢哋幻想自己有幾多個性伴呢？最近有外國組織就訪問咗7個歐洲國家嘅成年男女，睇吓佢哋希望有幾多個性伴，包括英國、意大利、荷蘭、丹麥、法國、西班牙以及德國，當中以荷蘭人要求最低，佢哋希望有2個性伴就夠喇，最理想性伴就係10個。至於最貪心嘅就係丹麥人，佢哋至少要有4個性伴，最理想性伴數目係22個，使唔使咁多呀！
小弟最近識到一個女仔，同佢WhatsApp傾咗兩日之後，就膽粗粗約佢去街，可惜被對方狠心拒絕，令我好失落，幸好小弟天性樂觀，決定放長線釣大魚，繼續勇往直前慢慢溝！而最近就畀我喺一個日本兩性專題網站，發現到增加約會成功率嘅兩大技巧，首先向對方提出約會請求嘅時候，最好係將約會內容講得具體少少，例如約對方睇戲，就要稍微解釋一下點解想同佢睇呢齣戲，劇情講乜，專家話咁做令對方安全感大增，同時引起其意欲。第二個技巧係「三顧草廬」，專家話千祈唔好因為第一次提出邀請被拒絕就縮沙，仲引述加拿大麥吉爾大學嘅研究指出，向對方提出三次邀請能夠令約會成功率提升31%！原因係女仔對你唔熟悉，當然唔會咁容易應約，第一次拒絕你就縮沙，女仔以為你對佢已經冇興趣，咁佢就更加唔會將你當係一回事喇！今次唔得下次再約過，最好係詼諧形式提出約會，令對方感到你有誠意又有情趣，自然對你興趣大增啦！
撰文：賢