相信大家一定睇過《龍珠》，撒亞人嘅特性除咗好勇鬥狠，受過重傷之後往往可以令戰鬥力提升。其實我哋地球人亦應該好似佢哋咁，受過傷要變得堅強，而經歷過襲擊之後嘅入山杏奈唔單止更加堅強，仲索咗好多添！
男人就係咁硬頸，阿媽叫佢去東就去西，愈大聲愈惡，就愈激起佢哋嘅反叛性唔肯合作。之不過，如果係一個柔弱女仔向男士百般要求，佢哋卻會甘願為對方赴湯蹈火亦冇半句怨言。男人就係咁奇怪，亦唔怪得一向都自認係真男人嘅小弟我一見到入山杏奈就即刻軟晒，我係話個心咋！
年方二十嘅入山杏奈嬌美迷人，氣質脫俗出塵，綺麗面孔之中夾雜一股柔情似水嘅動人神韻，相信任何男人見到佢嘅時候，幾暴躁幾血脈擴張都好，亦會冷靜落嚟，由猛虎變為一頭溫馴小綿羊，難怪入山杏奈能夠成為日本超人氣團體AKB48其中一位標誌性人物。同好多AKB48成員一樣，入山杏奈除咗靚女，身材亦相當誘人，肌膚雪白鮮嫩，腰幼而上圍大小適中，配合埋一副迷人美貌應該冇男人會唔鍾意。然而，世界上就係有傻佬居然會向杏奈施襲，實在令人髮指！
入山杏奈喺2010年憑住過人氣質，通過選拔大會而進身為AKB48研究生，即係預備組其中一員，經過一年嘅培訓之後其出色嘅演藝表現獲得賞識，喺2011年終於被提升為正式成員，同年仲隨團隊來港演出添。入山杏奈喺團體當中發展順利，好可惜喺2014年發生咗一件不幸事件，搞到阿妹一度活於陰霾之中。
話說嗰年5月，入山杏奈同其他AKB48成員去到岩手縣舉行握手會，期間突然殺出一個揸刀嘅歹徒向佢哋襲擊，杏奈雖然冇性命之虞，但係右手手指同頭部受創，精神上亦同時受到傷害，傷勢康復之後有一段日子精神緊張兼且害怕聽到較大聲浪。幸好，杏奈得到身邊人悉心照顧，拍電視劇《黑衣故事》嘅時候，更得到特別對待，導演見佢右手受傷而安排佢做一個左撇子嘅角色，加上得到粉絲支持令佢感受到大家嘅關懷，而杏奈話自己一定要堅強，因為身邊有好多姊妹對自己不離不棄。家陣杏奈不論精神上同肉體上都已經康復，上年年尾拍攝電視劇《警報 刑警×女友×完全惡女》當中有出色表現，演藝前途一片光明。
年齡：20歲
身高：5呎3吋
三圍：32-23-33
簡介：入山杏奈同一班AKB48成員感情要好，從其微博當中可以見到杏奈成日同班姊妹一齊吃喝玩樂，想了解一下佢哋平時點樣相處，可以Click上佢個微博睇吓。
網址：https://twitter.com/iriyamaanna1203?lang=ja
撰文：賢