陽光女孩不但散發出活力美，更將正能量感染畀大家，內地模特兒羅婉瑩就係其中之一，阿妹有一張迷人樣貌，同時擁有前凸後趷嘅火辣身材，佢所散發出嘅活力及魅力，令佢喺選美比賽中獲得佳績，更喺模特兒界站穩陣腳。
現年24歲嚟自黑龍江大慶嘅羅婉瑩，英文名Leviry，非常特別。作為一位模特兒，佢嘅外在條件實在無可挑剔，身材高挑加上前凸後趷，胸部唔會太大予人誇張嘅感覺，勻稱得嚟更唔會搶去佢其他部位嘅魅力，確實係個天生模特兒嘅材料。畢業於貴州財經大學藝術學院嘅婉瑩，喺就學期間一直專心讀書，直至大學畢業後，先至開始模特兒生涯。縱然比一般模特兒遲咗少少入行，但正所謂「金子總有發亮的一天」，憑住俏麗嘅外形，甫出道火速成為炙手可熱嘅模特兒，經常喺平面媒體上亮相，更以車模身份喺各大車展登場。除此之外，佢積極參加選美比賽，喺2013年國際城市旅遊小姐大賽貴州賽區中獲得季軍，喺2015年第44屆洲際小姐選美大賽中奪得貴州賽區冠軍，得到優秀成績唔單止因為佢出眾嘅外在條件，更在於佢無時無刻發揮正能量嘅陽光魅力。
有人話陽光魅力呢個詞語相當空泛，究竟有乜實際啲嘅嘢可以證明婉瑩有呢種迷人氣質呢？如果大家有睇過佢嘅寫真，便會感受到佢眼神中有一份對生命嘅熱愛，而佢嘅肢體語言亦無時無刻表現出自信。須知道作為一位模特兒，唔係賣弄身材，亦唔係展示商品嘅布景板，最重要係可以帶出一種可以感染到他人嘅氣質，否則又點樣吸引到人欣賞佢，以及佢所展示嘅商品呢？
對一般嘅模特兒嚟講，最能維繫到佢哋同粉絲之間嘅橋樑，莫過於喺微博以文字同照片同粉絲進行互動。不過對於婉瑩嚟講，呢啲仍然唔足夠，佢仲會自拍短片將生活點滴及工作情況放上網同大家分享。據佢解釋，短片更具立體感覺，同時亦更能夠展現嘅個人魅力，拉近佢同粉絲之間嘅距離，亦因為咁，佢就有「秒拍達人」嘅稱號。當然，除咗短片外，相信粉絲希望佢推出更多性感迷人嘅寫真啦！
個人微博
簡介：模特兒工作其實並非一般人所諗得咁輕鬆，婉瑩喺微博表示為咗拍攝一輯寫真，喺接近攝氏零度嘅氣溫下着比堅尼浸溫泉，真係好慘情呀！如果想知道佢近況嘅話，就要去佢嘅微博睇下啦！
網址：weibo.com/luowanying
羅婉瑩Profile
出生地：黑龍江大慶
身高：173cm
三圍：34、25、35
撰文：魂