舞台劇喺香港不及電影、電視劇咁受人注目，不過喺日本就唔同講法，獲得大量粉絲支持，同時亦吸引好多寫真美人兒向此方向發展，好似森千夏咁就決定今年積極喺舞台界闖一番事業！
日本寫真界近年充斥好多小巧巨乳美人，好似童顏巨乳掌門人篠崎愛咁，個胸好大，但係生得唔高，睇落肥肥矮矮。不過，世上係冇完美，高挑美人生得高，但係上圍欠肉哋，然而咁樣唔代表佢哋冇吸引力，好似森千夏一樣能夠以火辣誘人嘅一面吸引觀眾喇！
今年27歲嘅森千夏，原名遠野千夏，大家唔好懶醒以為因「遠野」（軟嘢）令男士反感而改名，其實係因為2014年阿妹轉投另一間藝能事務所，順便改埋個名，希望轉會之後有一個新開始。森千夏面孔生得相當標致，小弟認為佢個樣同當年叱咤風雲嘅寫真女王雛形明子非常相似添。之不過，上圍就冇明子咁豐滿，幸好千夏有5呎5吋高挑身形，即使上圍只得B Cup，但係長腿加上肉感十足嘅優質靚股，總算可以彌補不足之處。
森千夏讀緊高中嘅時候夢想成為寫真偶像，佢將履歷寄到模特兒事務所RunaFrau，估唔到又畀人取錄成為寫真模特兒，後來森千夏更加勇闖賽車界，成為SUPER GT賽車女郎其中一員，而且効力4年之久，成為歷代同儕當中年資最長嘅一員，森千夏迄今依然以賽車女郎身份活躍車展以及賽車場，以其甜美面孔以及高挑身材吸引觀眾注目。
講到車，森千夏嘅性格亦同車有關，就係鍾意「車大炮」喇！據聞森千夏不時同朋友講笑，內容都係吹水居多，例如佢自稱係一代戰國霸主織田信長嘅後代，不過完全冇證據證明，真係畀佢吹脹！唔知係咪行為夠出位，令森千夏喺舞台界發光發熱，現時阿妹專注演出舞台劇，其投入又夠養眼嘅演出備受好評。
簡介：森千夏近年努力演出舞台劇，喺博客就可以見到千夏綵排同演出嘅情況喇！粉絲們千祈唔好錯過，當然唔少得睇埋阿妹嘅靚女相啦！
網址：http://ameblo.jp/chika-mori/
森千夏Profile
年齡：27歲
身高：5呎5吋
三圍：32B-24-35
撰文：賢