內地嫩模畀人嘅印象都係外形夠索、身材夠火辣，而寫真更係相當養眼，只係講到內在美，大家對佢哋又認識幾多呢？就以新人蘇糯米為例，呢位擁有天使面孔及魔鬼激凸身材嘅索女，性格並唔似佢外表咁柔弱，反而係樂觀得嚟又夠積極同堅忍，值得大家欣賞。
今年19歲嚟自上海嘅蘇糯米，英文名叫Mini嘅佢用過嘅暱稱真係有一大堆，例如小糯米、黄米妮、米妮大萌萌Mini等，可謂多不勝數。不過唔緊要，因為大家就算記唔晒佢嘅暱稱，只要睇過佢嘅寫真，就一定呢世都記得佢。糯米擁有一張萌味爆燈嘅俏臉，加上一對激凸嘅車頭燈及纖腰，外形真係無與倫比，充分演繹出童顏巨乳嘅真諦。憑住如此出眾嘅外形，佢推出嘅寫真自然十分搶手，最吸引係佢經常以超火辣嘅造型上陣，胸露深溝只不過係前奏，巨乳側漏先至係誘人重點，真係睇到人流晒口水，難怪佢出道冇耐，就成為炙手可熱嘅模特兒。
此外，佢係一位頗具名氣嘅Show Girl，先後喺多屆上海舉辦嘅電子遊戲展ChinaJoy中，為多個遊戲商站台。須知道如此性感迷人，外形又萌味十足嘅索女現身，必定成為玩家同攝影師追影嘅對象，一時間佢嘅名字充斥網絡，人氣直線飆升。仲有，佢同其他模特兒一樣踩入演藝界，曾參演多套微電影，演技有番咁上下。
阿妹成功上位，其性格亦幫咗佢一把。究竟佢憑住乜嘢性格特徵，令佢瞬間冒起呢？就係憑住「堅」同「忍」呢兩個字。所謂堅，就係佢堅持努力同認真工作，並且經常喺微博同粉絲分享最新近況。前者固然係重要，只係後者亦唔可以忽視，事關現今內地模特兒同粉絲群接觸嘅最大橋樑，莫過於喺微博上同大家進行互動，加上佢細心又萌嘅表現，自然能夠討得粉絲嘅歡心。
至於忍，更係佢成功嘅最大重點，大家都明白內地一啲唔守規矩嘅模特兒，會透過副業嚟賺外快，亦由於呢班人令到模特兒嘅形象有負面影響，而作為網絡女神嘅佢，經常受到一啲邪念網民嘅滋擾。面對呢啲瘋言瘋語，佢喺微博上剖白：「我不是外圍（即係打住模特兒旗號，提供性服務嘅女性），也不是小姐。我就是在努力工作賺錢學習舞蹈。我只是喜歡拍照，所以各種風格照片我都會拍一些，如果你們誤以為我拍的照片漏（即係火辣），就定義我是外圍，那我也不會去和你爭吵甚麼，因為我不是所以也不會在乎，只是跟你們澄清一下，希望人人都有一個樂觀的心態，積極向上。」如此堅忍嘅性格，就算有乜嘢困難都難佢唔到啦！
簡介：如果只係用童顏巨乳嚟形容糯米嘅話，未免唔係咁尊重佢，皆因佢嘅內在美亦同樣值得大家發掘同欣賞，要了解佢最佳嘅方法，當然係成為佢個人微博嘅粉絲，自然可以緊貼佢最新近況同生活點滴。
網址：www.weibo.com/u/5650814673
出生地：上海
身高：165cm
三圍：36、23、36
撰文：魂