咪以為成人遊戲只要有鹽花同曳曳場面就得，事關家陣嘅電玩迷好奄尖，冇出色嘅故事好難令佢哋覺得滿意，於是日本人氣成人遊戲商Clochette喺絞盡腦汁下，推出呢個戀愛遊戲《從夏天開始的純真》。又係戀愛題材？冇錯，但佢嘅故事真係寫得幾出色。話說喺未來嘅日本，只有考試成績好嘅人，至可以參與時空旅行從而回到過去。不過落第生男主角千種由嗣，卻莫名其妙被選中，並且嚟到鄉村晶生村。正當佢徬徨無助之際，邂逅美少女初姬並被對方收容，其後更被特別允許留喺村內，過住係男人都羨慕嘅畀女圍嘅生活，包括村長個女、同樣嚟自未來嘅美少女姊妹花、萌爆純情女鄰居等。如果要逐一侍候佢哋嘅話，睇怕男主角呢世都唔使走。