堅守底線 拒與公仔大戰

每個人都有自己嘅道德底線,如果冇,呢個可能唔係人,而係禽獸,當然亦可以係衣冠禽獸啦。喺色情漫畫當中,男女主角就好似冇乜底線,話做就做,然而咁樣嘅劇情唔會好睇,好似經典漫畫《由莉亞100式》咁,為男主角設定底線,就可以製造矛盾,劇情就有較多變化喇。

表情生鬼

一個電影人能夠自編自導自演當然厲害,之但係一個人嘅精力、時間及心力有限,要同時兼顧多方面嘅工作,一來辛苦,二來有時亦難免顧此失彼。而炮製一部漫畫都一樣,自編自繪嘅例子好多,但係經典漫畫,尤其係經典情色漫畫唔少都係畫作與編劇分別由不同人士擔當,早前介紹過嘅《淚眼煞星》以及《實驗人形》就係最佳例子,今日講嘅《由莉亞100式》亦一樣。《由》喺2005年推出,2010年完結,一共推出12本單行本。原作者就係原田重光,負責畫作嘅就係萩尾信人。大家可能對萩尾信人頗為陌生,佢嘅畫功相當唔錯,繪畫人物表情生動細緻,就好似《由》咁,將角色嘅喜怒哀樂充分表達,我最鍾意就係佢能夠將女角對性事嘅羞澀表情細膩描繪喇。

始終唔入

《由》故事講述男主角久保瞬介係一名高中生,某日喺街上遇到青春迷人,對世事唔多知情嘅美少女由莉亞百式。而佢其實係變態博士秋葉步精心製造嘅人形公仔,係為滿足博士嘅性慾,之但係由莉亞卻係厭惡博士嘅變態思想,於是離家出走。雖然由莉亞表面上唔鹹濕,之但係思考系統每每會將所見所聞聯想到性事,一諗到性事,身體嘅本能就驅使佢不自覺咁侵犯呢位收留佢嘅久保瞬介。然而,瞬介仔本身都幾正氣,而且唔想亂佔由莉亞便宜,又知道一旦將命根進入由莉亞嘅私處,佢嘅獨特設定就會令由莉亞一世都成為自己嘅性奴,故此每次由莉亞要亂嚟,瞬介仔都會堅守道德底線,堅持唔會進入,有時仲會被由莉亞嘅突襲觸發自衞本能,一拳打到由莉亞飛起,搞笑劇情由此而來。之不過,咁唔代表漫畫冇鹹濕場面,因為堅持唔進入而已,瞬介仔有時都會被由莉亞嘅口技以及各種挑逗技巧征服,乖乖地畀由莉亞引爆,雙方似性非性嘅曖昧關係同行為,亦使劇情多添一種令人心癢癢嘅感覺。

撰文:賢