模影模蹤:腿模女王林瑞瑜

台灣腿模嘅歷史應該有十年八年左右,以前係一班有共同興趣嘅攝影師組成嘅分享網站,後嚟照片愈嚟愈受歡迎,所以慢慢變為收費網站,而今日要介紹嘅靚女,佢絕對可以稱為「腿模女王」,而佢嘅名字就叫做林瑞瑜!

斯文大方

嚟自台灣嘅林瑞瑜,英文名叫Sara,今年30歲,但樣子一啲都唔似,斯文大方,清純可愛,睇相片仲以為佢23、24歲,大約十年前喺國立台灣師範大學讀書,主修行政管理,喺2006年畢業後就被朋友鼓勵,走咗去做模特兒。剛才講過佢樣子清秀,加上身高有170cm,所以唔做模特兒真係浪費,初出道時佢做過服裝模特兒同埋車模,更出席過不少動漫騷。但後嚟唔知點解,佢乜都唔做,專做腿模工作,由2007年至2013年為止,佢一共拍攝咗近五十輯美腿寫真,真係隔一個月就拍一輯,以一個收費網站嚟講,模特兒幾靚都好,冇人畀錢睇相都冇用,所以能夠一直拍咗七年咁長時間,可想林瑞瑜有幾咁受粉絲歡迎,唔少網友都封咗佢做台灣嘅「腿模女王」。

十年如一日

林瑞瑜出道多年,為人十分低調,除咗初出道時活躍少少,之後就只接拍腿模工作,亦冇上綜藝節目亮相,有人懷疑佢近年已經轉行,模特兒只係兼職而已!由於貴為台灣嘅「腿模女王」,所以好多朋友都想知道佢點樣保養佢對42吋長美腿,林瑞瑜表示佢對腳平時冇乜特別保養,只係每日沖完涼後都會搽啲潤膚液,甚至運動都冇做!能夠保持得咁好,十年如一日,真係唔佩服佢都唔得,至於拍攝時嘅腿部動作,佢話自己初出道時候,冇嘢做都會喺屋企一邊照鏡,一邊諗啲新造型出嚟,但後嚟影得多咗,只要一到拍攝現場就會自動擺甫士,唔使再花時間去諗。至於咁多造型佢最喜歡邊個?佢話喜歡辦公室女郎,所以有粉絲懷疑佢做咗上班族,真係有咁嘅可能!

好料推介

簡介:近年林瑞瑜甚少拍寫真,所以微博新照片較少,網上見到全部係佢嘅生活記錄,但之前嘅寫真九成都有存檔,加上活動時照片,絕對值得捧場!

網址:www.weibo.com/971476267

Profile

林瑞瑜

出生地:台灣

三圍:32-24-34

身高:170cm

撰文:龍四海