有人喺郊外野戰，竟然要花一百五十萬港幣嚟埋單，做乜嘢要使咁多錢呢？中國古人話囡囡屁股大好生養，原來係有科學根據？想姊妹們多愛自己，欣賞多啲自己身體嘅獨特美，有紐約囡囡竟然脫得光光嚟喺大街上狂奔！近期最新鮮嘅趣聞，即刻同大家「些牙」！
英國有對情侶去到美國內華達州旅行，喺渺無人煙嘅風景區內可能被美景吸引，突然慾火焚身，於是就喺荒天野地就地正法，好衰唔衰已經55歲嘅男主角，受唔住戰況太過激烈，竟引發心臟病，女友要跑五公里去報警救助，而由於肇事地點喺深山之內，更要出動消防員、郊野公園巡警等，最後仲要出動埋直升機送院，男主角僥倖不死，但由於係旅客，醫療費用就要自己埋單，最後一計竟要花25萬美金，足足百五萬港紙，成為最貴嘅「野戰」代價！
中國人嘅傳統智慧真係唔到你唔佩服，最近美國匹茲堡大學有份研究指出，女士如果臀部和大腿豐滿，大家千萬咪減咗佢，特別係做人阿媽嘅就更要三思，因為呢兩個部分嘅脂肪，正係組成人腦健康成長嘅重要元素，如果肥臀粗腿嘅媽媽再用母乳嚟餵哺小朋友嘅話，呢種元素就會讓小朋友直接吸收，小朋友腦部發展得會更好，比較扁臀瘦腿媽媽嘅孩子更聰明，學習更有效果，正正係古人講老婆屁股大就好生好養嘅道理，所以巨躉妹呢期有市場啦！
美國有調查指出，小學五年級到高中三嘅小女孩心目中，70%嘅人都受到不同媒體廣告所推廣嘅「完美身材」觀念所影響，所以佢哋成日都會抱怨自己生得唔夠靚、唔夠高、唔夠瘦、唔夠大等，有啲小朋友仲會因此患上情緒病，對自己人生和前途都抱着極負面嘅態度。而近日紐約有個囡囡，鼓勵大家愛自己，欣賞自己嘅獨特美，於是脫得光光，喺大街上裸跑，最後仲整成視頻放上網，我睇過視頻，阿女身材真係唔掂，但勝在精神可嘉，畀個讚你！
撰文：小德