渡海濠情：拾金不昧 老實好人
早前有解款車大意跌錢搞到銀紙滿天飛，有人把錢交還，亦有人可能諗住據為己有，而嚟自凱旋桑拿嘅小靜就話最討厭呢種人，所以想請教師傅乜嘢生肖嘅人最老實，執到錢都唔會私吞。
第一位：肖狗 忠厚老實
師傅話十二生肖中最老實，見到地下有錢都唔會動心嘅就一定係屬狗嘅朋友，因為佢哋天生忠厚老實，唔係自己嘅嘢就點都唔會動，絕對係擔屎都唔會偷食嘅代表，而且情況許可，佢哋仲會守住財物等候物主回來認領，絕對係靠得住嘅朋友。小靜話：「我老竇就係肖狗嘅，唔好話有錢唔會去執，就算有錢都唔去賺，所以做親生意都蝕，注定佢一世幫人打工，因為佢覺得賺多人一分錢都會內疚，所以點做生意吖！好在我冇遺傳佢嘅老實基因咋！」
第二位：肖牛 本質忠誠
屬牛嘅朋友亦都係出名正直忠誠，但師傅話要睇個別人嘅成長環境而定，例如受過教育嘅，就會正義到不得了，但如果成長環境偏差，就會覺得做啲壞事都冇乜特別，所以重點係佢哋小時候有冇受過教育，就決定佢哋一生嘅價值取向。小靜話：「我之前有個男朋友就係屬牛嘅，佢自小就冇乜讀書，做壞事總覺得天經地義，最離譜就係除咗對錢銀唔老實，對我呢個女朋友亦都好唔忠誠，經常出外拈花惹草，最後忍無可忍，決定同佢分手。」
第三位：肖馬 面子攸關
師傅話天生老實嘅人真係好少，勉強要數到第三位，應該係屬馬嘅朋友，佢哋見到地上有錢都唔執，並唔係唔想貪錢，而係怕別人作出反應，唔想遭人閒言閒語，因為屬馬嘅朋友最重面子，如果因為執錢而令佢哋冇面嘅話，佢哋寧願唔執好過。小靜話：「我姐姐就係屬馬嘅，佢真係乜都唔驚，就係怕瘀，乜嘢人都冇時，佢乜都夠膽做，但喺大街大巷，佢連同人嗌交都冇膽，所以同佢出親街，次次都要我嚟保護佢，所以屬馬嘅朋友真係太重面子啦！」
本周大吉生肖
異性運：豬、牛、虎
桃花運：馬、羊、狗
和合運：猴、兔
小靜Profile
年齡：20歲
三圍：35-24-34
撰文：小德
攝影：阿俊