踏入2015年嘅第4日，唔少人都希望喺今年能夠大展拳腳，其實全球嘅成人產業界亦早已蠢蠢欲動，希望喺今年帶畀大家極盡視聽享受兼且眼界大開嘅火辣演出。想知今年有乜嘢畀到大家意想不到嘅感官刺激，就要留意以下嘅「2015年火辣大事預告」，就唔會錯過擴闊視野嘅機會啦。
嚟到新一年又係美國四仔業界派發成績表嘅日子，而搶先登場嘅就係喺美國成人業界有相當地位，由著名成人產業貿易雜誌XBIZ所舉辦嘅XBIZ頒獎禮。呢個頒獎禮至今已係第13屆，每年頒發各個獎項以表揚四仔業人士喺過去一年嘅付出，講到當中嘅重頭戲莫過於最佳四仔作品同最佳女脫星兩個大獎啦！由於評審團都係由業內權威人士、著名監製、導演及名人堂脫星所組成，故此極具公信力，因而被視為四仔奧斯卡AVN頒獎禮嘅前哨戰。除咗有索爆脫星登場外，今年大會更搵嚟著名男脫星James Deen做主持，更係顯得星光熠熠。
官方網站：xbizawards.xbiz.com
講到喺美國四仔界具有超凡地位嘅頒獎禮，絕對唔可以唔提由美國成人新聞雜誌Adult Video News所舉辦嘅AVN頒獎禮。呢個被譽為美國四仔奧斯卡嘅頒獎禮，至今已經係第32屆，從佢悠久嘅歷史足見佢嘅江湖地位。此外，更設有業界名人堂，以表彰業界貢獻人士，當中不乏傳奇四仔導演同男女脫星。每年例必喺拉斯維加斯舉辦嘅頒獎禮，今年不但喺Hard Rock酒店舉行，更搵嚟業界著名男脫星Tommy Pistol同女脫星Alexis Texas做主持，又請嚟業界重量級人馬頒發各個獎項，而當中嘅焦點莫過於年度至尊女脫星、最佳女脫星及唔同主題嘅最佳四仔作品等獎項。
官方網站：avnawards.avn.com
除咗美國有四仔頒獎禮外，作為亞洲嘅成人產業工廠，日本AV界亦有地位舉足輕重嘅頒獎禮，佢就係第11屆Sky PerfecTV成人放送大賞。自2005年舉辦首屆頒獎禮開始，大會每年都選喺日本東京舉行，而佢最大嘅特色就係各地嘅AV迷都可以透過網上投票，選出心水最佳女優、最佳新進女優、最佳熟女女優及最佳作品賞等多個獎項。此外，佢哋更設有專為女性AV迷而設嘅最佳男優選舉，從而表揚業界男女優嘅付出同努力。AV迷從即日起至2月20日就已經可以投票，如果想入場支持心水男女優嘅話，亦可喺1月31日前登入官網預購門票添！
官方網站：adult-awards.com
如果想一次過睇晒艷舞、有味話劇、情色音樂騷等成人演出嘅話，喺德國柏林舉辦嘅情色匯演Berlin Burlesque Festival一定可以滿足到你。作為全球著名嘅情色演出大匯演，嚟到第3屆，佢哋將會喺為期4天嘅活動時間內，透過每晚唔同嘅主題，分別有The NEWCOMER Night、The ODD Night、The EVEN Night等，為大家帶嚟來自全球各地，當中包括中國、美國、日本、德國、瑞士、英國、荷蘭等專業演員及團體，以艷舞、魔術、棟篤笑、愉虐等表演，呈上藝術同視聽享受兼備嘅火辣演出。如果想知道更多嘅節目詳情，可登入佢嘅官網度睇吓。
官方網站：www.berlin-burlesque-festival.com
每年全球各地都有大大小小各種成人博覽會，只係講到最大型嘅則非美國嘅eXXXotica Expo莫屬。自2006年喺邁阿密舉辦首屆開始，至今已踏入第9個年頭，而今年則選喺新澤西州舉行。以「Celebration of Sexy」（性感慶典）為主題嘅博覽會，雲集嚟自全球嘅成人產品、成人影片、男女脫星、電玩等展銷商，喺度展出各種最新、最先進、最引人入勝嘅產品，又透過各種脫星及粉絲互動遊戲，將AV迷帶入同女神零距離嘅空間。此外，同場更舉辦由粉絲投票選出最愛脫星、最愛四仔、最愛男脫星嘅頒獎禮「Fan Choice Awards」，多元化嘅活動難怪被稱為全球成人產業嘅嘉年華！
官方網站：twitter.com/exxxotica
對愉虐迷嚟講，梗係唔可以錯過愉虐界盛事Fetish Con。自2001年開始舉辦嘅Fetish Con，最初只不過係一個愉虐產品界嘅展銷會，而當年喺紐約舉辦首屆嘅活動規模亦相當細，會場最多只能容納500人。不過隨住愉虐玩法開始入屋，呢個活動慢慢壯大更成為全球最大型嘅愉虐博覽會。嚟到第15屆，今年活動將於佛羅里達州坦帕（Tampa）舉行，回顧去年有超過百個參展商，可以肯定到時一定更加熱鬧。博覽會引人之處除咗有各類愉虐情趣產品展銷外，更有愉虐四仔、索爆脫星及一眾火辣愉虐女郎表演，好此道者千祈唔可以錯過。
官方網站：www.fetishcon.com
如果以為人體彩繪只不過係用唔同嘅顏料喺裸模身上畫畫，呢種諗法真係太膚淺！呢個每年夏天喺奧地利舉行嘅World Body Painting Festival，就為大家帶嚟最前沿、最高技巧及最創新嘅人體彩繪盛宴。早喺1998年開始舉辦嘅人體彩繪節，最初只係一個夏季旅遊推廣活動，時至今日佢不但成為一個重要嘅慶典，更雲集全球嘅彩繪高手以噴畫、手繪及特技化妝，連同一眾火辣裸模呈上既與別不同又極具感官享受嘅人體彩繪。今年為期5天嘅人體彩繪節將假於湖畔城鎮Portschach舉行，除咗有彩繪展示外，仲有彩繪舞台騷、彩繪攝影展、人體裝置藝術等環節。
官方網站：www.bodypainting-festival.com/en
撰文：魂