模影模蹤：廣瀨玲奈教人搖又滾

童顏苗條

喺香港好多女演員做做吓戲就會走去唱歌，之不過成績認真麻麻，唔少仲同佢哋嘅演技一樣咁曳，對於影迷、歌迷乃至本地娛樂圈都係一種悲哀！遙望遠處嘅日本就完全相反，好多女星甚至係AV女優唔單只做戲好，歌喉一樣見得人，好似AV界嘅冬月楓最近仲出埋唱碟展露其迷人歌聲，而廣瀨玲奈亦係由水着界殺入樂壇嘅其中一位。今年22歲嘅玲奈甜美可人，相貌標致又帶稚氣，認真係人見人愛，若然係宅男的話，見到玲奈一定被迷到神魂顛倒，老竇姓乜都唔記得。身材屬於纖巧型嘅玲奈，三圍尺碼就唔見得有乜突出之處，但勝在條腰只有22吋咁幼，令身材睇落苗條而又有曲線美，加上夠年輕，肌膚又白又嫩，養眼度高企！

雜誌開班

廣瀨玲奈參加模特兒選美比賽出身，喺2010年成功勇闖第二屆「Gravure JAPAN」嘅入圍名單，雖然未能再進一步，但係其嬌美面孔同身材已經惹得唔少人注目。到2011年，玲奈喺同類型嘅選美活動「日本Telegenic 2011」就成功奪得冠軍，認真叻女。挾住冠軍之名，喺水着界同藝能界都發展如意，參演過嘅綜藝節目唔少，例如《全力坂》、《夜遊三姊妹》以及《偶像之穴》等，同時亦為特撮片集《特命戰隊》演出過。除以美貌同身材取悅觀眾，玲奈一身搖滾樂技巧一樣得到支持，成為搖滾樂隊「Bright-on」嘅結他手，仲不時同樂隊四圍登台。另外，玲奈仲有自己嘅電台節目《廣瀨玲奈之ROCK'A BEAT CAFE》，更曾經多次喺知名搖滾樂雜誌開設教學專欄，教人彈結他同作曲，同佢一齊又搖又滾。

廣瀨玲奈Profile

年齡：22歲

身高：5呎1吋

三圍：31-22-31

個人博客

廣瀨玲奈幾乎每日都會將自己嘅生活點滴喺博客中同大家分享，想知道玲奈每一日到底點度過，可以Click上佢個博客睇。

網址：http://ameblo.jp/hirose-reina/

撰文：賢