雞軟骨相信大家都食過唔少，我個人最喜歡都係日式炭燒，因為夠晒風味，但講到創意就真係要佩服吓我哋嘅中菜大廚們，近年雞軟骨嘅中式做法，可以話千變萬化。唔好講咁遠，就講澳門大富豪桑拿，佢哋炮製雞軟骨嘅方法就不斷帶畀人驚喜，我記得之前介紹過一個四川風味嘅辣汁炒雞軟骨，一食已經令人畢生難忘，最近佢哋又有新搞作，就係推出蒜鹽脆軟骨。大家平常食嘅都係椒鹽味道，但大廚今次忽發奇想，諗到用蒜鹽嚟做調味，而雞軟骨嘅做法亦有啲改良，唔直接落鑊，反而加一層脆漿，加強雞軟骨嘅香脆感，炸好後就灑少少蒜鹽調一調味，食時會配碟蒜鹽，客人可以按自己口味加多減少蒜鹽嘅分量。我即時試咗一舊，脆漿加強口感外，仲可將雞油封存，所以咬入口時雞油肉汁加上淡淡嘅蒜香味，真係好食到不得了！