俗語話聽古唔好駁古，睇戲就係要睇人做戲，所以劇情誇張又或者太多巧合都只係為觀眾帶來娛樂而已，千祈唔好嫌這嫌那。不過，一般情色電影又真係做作得過分，男女主角拖拖拉拉，剝件衫都要成10分鐘！而來自奧地利嘅情色電影《安塔芮絲》，就擺脫呢種手法，每場床戲都嚟得清脆利落。
《安》片由三個故事組成，每一段都充分表達出男女之間嘅關係，包括矛盾、無奈等。第一段故事講述已婚女護士伊娃，雖然有老公又有個女，但彼此間關係疏離，即使老公幾咁顧家，伊娃依然冇辦法投入。當中嘅原因可能係有一段婚外情，伊娃經常同舊情人湯馬斯去到一間舊式公寓幽會，二人一見面就瘋狂做愛，投入縱慾當中。然而，二人嘅交往只係在於性愛之上，伊娃仲似乎想藉呢段婚外情，令自己從現實生活中得到解放。
第二段故事講女收銀員蘇珍為咗綁住男友，扮成有咗身孕，希望催逼男友結婚。只可惜男友馬可斯係就係好高興，但仲未肯結婚，於是蘇珍就懷疑佢可能有第三者，於是歇斯底里咁搵出證據，卻無任何發現。但事實上，馬可斯每次都藉放狗嘅機會同第二個女人幽會，最後知道事實嘅蘇珍因傷心過度而自殺。
第三段故事係講阿歷士因為酗酒兼有暴力傾向，被妻子拋棄。之後阿歷士卻未能接受現實，終日繼續其買醉嘅生活，兼且試圖當街勾搭妓女，只可惜阿歷士嘅醉鬼外形連妓女都接受唔到，令佢飽受挫折，再同前妻糾纏。另一邊廂，妻子妮歌愛上第二個男人，但係對方已經有一個穩定嘅女友，呢段感情亦注定失敗收場。
呢部電影實而不華，少有商業元素，多咗幾分真實感，雖然三段故事嘅女主角都唔係咩美艷尤物，仲有少少鄉土味，但正正係咁，令全片感覺更平實自然，加上做愛場面逼真又清脆利落，叫人睇得過癮又投入！
撰文：賢