正所謂唔係猛龍唔過江，外地影要打入其他地區嘅市場，一定要有番咁上下質素至得。至於外國AV要打入日本市場亦同樣唔容易，不過，最近有部法國色情片成功攻日，預料業界將會掀起外國風潮。
如果大家有去日本逛過AV商店的話，必定會發現店內除咗日本AV之外，其他國家嘅AV一隻都冇。事實上，日本AV迷又的確唔多鍾意外國貨，原因係嫌佢哋冇劇情又拍得冇乜美感。不過，於未來日子當中，日本AV迷嘅心態可能會有所轉變，皆因法國巨製AV《Inglorious Bitches》已登陸日本。呢部作品來頭真係勁到震，由知名法國AV製作人Marc Dorcel主理，參演嘅囡囡超過20位，陣容鼎盛。故事以二次世界大戰作背景，為咗營造二戰時嘅氣氛，出動到大量軍車拍攝，以及有唔少爆破場面，據聞製作費高達35萬歐元，即差不多400萬港元，認真厲害！
據資料顯示呢套法國AV於2011年已經推出，之不過一手將之引入日本嘅AV廠桃太郎映像為咗要傾版權，所以同該片嘅製作公司Max Candy洽商咗一段日子，加上Max Candy又忙住將作品交到美國成人奧斯卡AVN頒獎典禮參賽，所以作品於兩年後至落地日本。雖然套戲最後只係得到最佳導演獎項，但係作品質素極高，加上有桃太郎映像大力宣傳，所以喺日本AV銷售網DMM反應良好，有業界人士指出有機會憑此作引起日本AV迷對外地AV嘅興趣，亦相信其他AV廠效法桃太郎引入更多外地作品，令AV界發展更多元化。
今年，熟女AV廠Madonna成功發掘到瑞典人妻Angelina，以及另一位歐洲AV女優Mia Malkova都成功喺日本AV界站穩腳，顯示日本AV迷漸漸接受到外地嘢，只係等一個熱潮出現而已。
撰文：賢