高學歷嘅模特兒，內地真係有唔少，好似今日介紹嚟自上海嘅靚女模特兒黃子真，喺上海師範大學畢業後，又喺中南大學修讀碩士課程！閒時客串做吓平面模特兒，由於佢學歷高兼身材好，所以深受廣告客戶歡迎，可以話係人氣強勁。
呢位充滿才情嘅小美人，出道已經有兩三年，不過由於為人低調，又冇任何專屬網站，所以資料唔多。但網上不時會有佢嘅照片流出，而且大多數非常性感，十居其九都係內衣或泳衣廣告。由於子真上圍有35D，加上樣子清新，所以好多攝影師都會搵佢影相，可惜由於冇寫名，所以好多人都唔知佢係「乜水」。至於，真正令佢開始畀人認識，就係為某大遊戲廠商做展覽會代言兼現場主持。子真雖然斯斯文文，但原來能言善道，不停與來賓互動，令展區萬人空巷情緒高漲。自此就成為炙手可熱嘅代言女王，加上佢扮乜似乜，所以任何Cosplay造型都難佢唔到。不過專注學業嘅佢，始終保持低調。
舊年騰訊網搞咗個《三國紅顏至尊》活動，由於有得扮古裝，所以激起子真嘅興趣走去參加，最後憑住內涵同完美身材，喺數萬名參賽者中脫穎而出，贏得文武才情四美中，以文見稱嘅蔡文姬代表身份。自此子真就以遊戲中蔡文姬嘅古裝造型幫手宣傳，動人的古裝扮相，令佢人氣更加急升。佢嘅資料同以前影過嘅相，全部都被發掘出嚟，大家先知原來佢已經出道多年。子真作風一向前衞大膽，今年嘅發展據講會更多元化，大賣性感令粉絲流晒鼻血外，仲會朝才女方向邁進，至於佢誘人的古裝造型，個人覺得絕對適合進軍影視界，不過最好飾演唐朝美女，因為唐朝嘅女士服飾，先至可以展露佢澎湃嘅事業線。
簡介：由於黃子真冇開專屬網站，要睇佢嘅寫真照片，就要登入佢粉絲群嘅網站，先可以睇得到，而呢個網收錄咗唔少子真嘅性感照，值得捧場。
網址：http://tieba.baidu.com/f?tp=0&kw=%BB%C6%D7%D3%D5%E6
出生地：上海
三圍：35-24-34
身高：163cm
興趣：美食、聽歌
撰文：龍四海