今日糜博：瞄準美女銷售員

身邊好多兄弟每到月頭都會呻窮，佢哋成日話幾乎每次陪女友出街，都會去大型商場。每當步入商場，佢哋都會流到一額冷汗，因為呢一刻已經百分百肯定女友要去購物，仲要叫男友找數！如果大家都有呢類麻煩，小弟希望今次可以打救到大家嘅荷包。美國早前有一個調查報告發現，女士去到服裝店飾物店，如果見到銷售員係靚女，而且打扮艷麗的話，通常都唔會留低太耐，亦唔會咁容易決定買嘢。原因好簡單，因為女人通常都想自己嘅打扮獨一無二，最怕就係畀其他女仔，尤其係靚女（潛在敵人）知道自己買咩衫同飾物，所以咪唔會放膽買嘢囉。所以，各位男士下次見女友心思思想買衫，不妨揀間有美女銷售員嘅舖頭，一來自己有眼福，二來仲可以保障自己個荷包添。