最近有調查研究發現，每日都剃鬚嘅男人，比隔日或隔幾日至剃鬚嘅男人長命啲，據講呢個研究報告，係刊登咗喺美國傳染病期刊內，內容話佢哋經過20年嘅觀察研究，發現835個已去世嘅男人，當中45%嘅男人係隔日剃鬚，而每日剃鬚嘅就只有31%，而中風嘅發病率，亦係隔日剃鬚嘅朋友比較高啲。
事後有專家就解釋，可能同男性嘅賀爾蒙有關，一般隔日或隔幾日至剃鬚嘅男士，明顯就不修邊幅，引致人際關係一般，感情生活可能嚴重缺乏，連帶性生活嘅比例都會較低，因此體內性腺激素亦會大量減產，於是令血管閉塞嘅情況更趨嚴重，所以專家就呼籲男士，最好每日都剃吓鬚，咁樣會令人精神爽利啲，心理狀態都會平衡啲。當人愈精神，話唔定會有感情生活出現，性生活也會回復正常，咁身體自然健康啲啦！
撰文：包曉