據佢所講，當晚間吧都幾靜吓，大半晚對着柔和嘅燭光同聽悅耳嘅音樂獨飲，正想返歸之際，突然睇見一位長髮型男，正當佢諗緊點樣上前搭訕之際，對方竟然走過嚟打招呼，仲主動坐埋去，想同佢飲番杯咁話。正值發仔寒時期嘅安琪，見到型男自然雙眼發光，梗係唔會拒絕啦！飲到咁上下，呢個男人就主動要求送安琪返屋企，我諗安琪肯定求之不得啫！

去安琪屋企樓下，見型男咁好人，於是佢就邀請佢上樓坐一陣，但孤男寡女獨處一室，之後發生嘅乜嘢事，相信唔使講都知！見到安琪擺明車馬等仔溝咁款，更何況佢樣貌都唔算太差，嗰個男人梗係食住上啦！

畀安琪搞掂咗件型男，我哋成班姊妹都戥佢高興。不過，唔夠三個月就傳嚟一個唔知好定壞嘅消息，原來安琪有咗BB，都唔明點解佢咁失策，以前遇到獵物，佢都會做足安全措施，家吓一次就中招，真係自己攞嚟衰。幸好呢個男人都算有良心，話肯負責任，如果唔係安琪就慘喇！

撰文：娟娟