減價引客

現年三十五歲嘅阿德，經常相約朋友北上消遣，早排佢同幾個老友到武漢遊玩，去到當地已經係夜晚八點，一行三人先到飯店飽餐一頓，然後再去揼骨鬆一鬆，行咗一陣，發現唔少桑拿都推出減價優惠，於是隨便搵咗一間桑拿落腳。

阿德話：「其實我早已聽聞內地夜場愈嚟愈淡，生意唔好，減價亦相當正常。當時我哋見到呢間桑拿門口有一個大型招牌，上面寫住『特惠價按摩』，兩個鐘服務都只係百零蚊，實在物超所值，梗係要試吓啦！入到去之後，一個年輕貌美嘅公關熱情招待我哋，跟住帶我哋去休息室，喺揀女嗰陣，雖然啲囡囡質素只屬一般，大多數都係村姑咁款，但見價錢咁抵玩，而且熄咗燈都係一樣，諗住冇乜所謂，點知上到房先知道中招。」

擺明屈客

入到房，囡囡就即為阿德解除身上束縛，然後叫佢瞓上床，並開始為佢按摩，但阿德發現，呢個囡囡根本毫無技術可言，手勢差之餘，更只係識得用死力，直頭有受罪嘅感覺。於是，阿德即時向經理投訴，更要求換人，點知對方話服務已經超過十分鐘，想換人嘅話，就先要先付呢次嘅費用。

聽見經理咁講，阿德當堂火都嚟埋，於是同佢理論起嚟，但經理點都唔肯讓步，最後仲叫咗兩個彪形大漢入嚟，仲講到明要走嘅話，就要繳付整套服務嘅費用五百蚊，去到呢個地步，阿德實在無話可說。

事後，阿德得知兩位朋友都同樣遇上被屈錢嘅遭遇，佢哋入房之後，囡囡求其揼幾吓就話要開戰，朋友唔肯，話只想揼骨，但對方就話已經開始咗，就算唔玩都要收番正價。呢個時候，三人終於知道，佢哋呢次幫襯嘅呢間桑拿，根本就係黑店。而二百蚊人仔唔使嘅按摩服務，當然只係用嚟吸引水魚嘅伎倆而已。

坐地起價

內地夜蒲黑店嘅屈水招數點只一種？據阿德所講，第二日到其他桑拿查看，發現部分場所推行「一場兩費」，意思即係港客就收香港價，內地客則收本土價，稍為不慎，中招都唔出奇。阿德話：「好多人以為開設喺酒店入面嘅桑拿比較穩陣，其實一樣有機會中招，好似喺我哋入住嘅酒店咁，內裏附設咗一間骨場，朋友冇問清楚收費就入去幫襯，結果畀人呃咗都唔知，事關呢間場原來有兩個收費，知道你係港人嘅話，就會收取一個比較貴嘅價錢，但如果係內地人或熟客就只可以收平啲，兩者相差百元或以上，真係無良到極！」其實內地唔少夜店都有「坐地起價」嘅情況，所以大家北上消遣時，真係要事先睇清楚、問清楚呀！

撰文：娟娟