切忌性格悲觀

據梁師傅講，要知囡囡係咪壞桃花，要留意佢哋嘅眉眼鼻，首先眼眉要生得清秀，最忌眉尾下垂，眉尾下垂代表你性格悲觀，做嘢唔積極，如果眉眼都向下垂，代表你結識嘅朋友，性格都會同你一樣悲觀。

遇上咁嘅情況，想有好桃花都難，再加上眉骨下陷同埋眉毛雜亂叢生，代表囡囡交朋結友來者不拒，但全都係悲觀唔積極嘅人，甚至可能係啲憤世嫉俗嘅人。

另外要留意奸門嘅位置，奸門即係眼尾與髮際之間嘅位置，如果呢處出現下陷，就代表會專惹壞桃花，就算畀你勉強結到婚，最後都會因為種種原因，而令你哋離婚收場，戴粗框眼鏡遮擋吓或者有幫助。

孩子鼻等人養

除咗眉之外，囡囡還要留意自己個鼻，如果鼻細小，鼻樑又生得夠高，鼻孔外露，而鼻頭有肉，據梁師傅講呢啲鼻叫做「孩子鼻」，顧名思意有呢種鼻嘅囡囡，為人好似小朋友咁冇主見，情緒又唔穩定。

一個冇乜主見，情緒又唔穩定，好似小朋友咁嘅女仔，感情上唯一嘅出路，就係要搵啲比自己年紀大嘅男人做男朋友，但年紀大佢哋十年八年嘅男人，有條件嘅都會結晒婚，所以好有機會做人情婦。

所以有孩子鼻嘅女仔，只要有人關心吓，經濟上又滿足到佢哋需要嘅話，佢哋就會接受對方，就算年紀相差十幾年，甚至已婚，佢哋都冇問題，最壞仲係佢哋認識親嘅男人，都係咁樣嘅，你話有幾咁惡劣。

三白眼愛挑戰

最後要睇埋對眼，如果雙眼自然張開時出現三白情況，就要小心，所謂三白，可分為上三白和下三白兩種，有呢啲眼嘅囡囡個性較倔強，做事為達到目的，可以不惜任何代價，而且做事積極進取，永不言敗。但喺感情上就比較麻煩，因為普通男人已經睇唔上眼，一係要啲出類拔萃，一係要啲騎呢另類嘅，好男人大多數已婚，所以亦難免淪為別人嘅情婦。

至於另類男人方面，佢哋往往向難度挑戰，偏向虎山行，佢哋會搵一啲古靈精怪行業嘅男人嚟交往，例如黑道中人、藝術家、藝人等等，注定辛苦一輩子，呢啲壞桃花，真係唔係人人都頂得住架！

撰文：小德

鳴謝：玄學家梁瑋鈞師傅