興奮刺激
呢兩位靚女都係嚟自澳門利×夜總會嘅好姊妹，一個係22歲嘅劉娟，佢笑容特別甜美，有時雙眼仲識得放電，而另一個就係21歲嘅小若，佢留有一頭長直髮，笑容滿面，一睇就知佢係醒字派嘅代表囡囡。
我哋先問雙眼識放電嘅劉娟，佢話：「以前好少遇過打颱風嘅日子，所以家陣每次打風，我都會約埋啲唔怕死嘅朋友，走去岸邊睇大浪泊岸。」咁危險有乜嘢好玩？劉娟話：「我哋幾個只要手拉住手，咁就唔怕畀啲風吹咗去，一啲都唔危險。」
咁有乜好睇啫？劉娟話：「就係睇啲浪一個打完埋嚟又接另一個囉！有啲浪打到半天咁高，加埋啲風，成條街都會濕晒，有時啲浪花打落塊面仲會赤赤痛，但啲浪花打得愈高，我就感到愈刺激興奮，有時仲興奮過坐過山車同玩笨豬跳呀。」
猶似紙鳶
除咗去岸邊睇觀浪，仲會玩乜嘢呢？劉娟話：「有次睇完浪，就諗住走去廣場搵嘢食，點知嗰度仲大風，吹到我哋一仆一碌，我哋於是索性由得啲風吹，啲風真係可以吹到我哋由呢頭一直飄到去另一頭，直情好似放紙鳶咁樣，好玩到不得了。」
除咗呢啲咁危險嘅活動，有冇啲冇咁危險㗎？劉娟話：「聽講香港人打風會去沙灘滑浪，自己亦好想去玩吓，心諗一定會十分刺激！」呢個咁喜歡刺激嘅囡囡，做佢男朋友真係唔憂會悶，打風都咁多嘢玩，平時一定更多，但有排替佢擔驚受怕啦。
至於另一個囡囡小若，又係咪喜歡玩啲咁險嘅玩意呢？小若話：「我一定唔會，我份人比較細膽，所以每次打風我都會好驚青，喺屋企都一定要搵人嚟陪，最好當然搵男朋友嚟陪啦，但萬一搵唔到男朋友，有時惟有搵啲姊妹喺屋企搞大食會。」
風雨洗禮
小若話：「由於我唔係咁喜歡打麻雀，所以要搵一班姊妹嚟陪我，就只能用大食會嚟吸引佢哋，好彩我都識得煮兩味，否則都幾難有人陪。如果有時打風打足成日，我屋企會更受歡迎，因為出面好多舖頭都冇嘢食，所以啲姊妹就會湧晒嚟我度。」
如果男朋友得閒陪你呢？小若馬上面紅紅咁話：「咁我哋會搵處地方，安安全全，溫溫馨馨咁享受二人世界，你可能唔知道，喺打風時，特別係風雨交加嘅日子，有時真係好需要有個男人喺自己身邊嘅，咁至有安全感嘛！」相信好多囡囡都贊成。
咁你會唔會整兩味畀男朋友食呢？小若話：「平時就會自己整兩味，但橫風橫雨嘅日子，都係食外賣好啲，多啲時間二人世界嘛！」小若最後總結，如果打風嘅日子，能夠同男朋友喺埋一齊，感情都會堅固啲，因為男女雙方都經歷過風雨洗禮喎！
小若小檔案
年齡：21歲
三圍：34、23、33
興趣：做浪漫少女
劉娟小檔案
年齡：22歲
三圍：36、24、34
興趣：做追風少女
撰文：小德
攝影：基斯